बजारमा हामीले जुनसुकै मौसममा मेवा तथा खर्बुजा देखिरहेका हुन्छौं।
यो बाह्रै महिना पाइन्छ। होटल–रेष्टुरेन्टमा यसको बढी खपत हुन्छ। हाल भारतीय बजारबाट ठूलो परिमाणमा मेवा तथा खर्बुजा आइरहेको नेपाल फलफूल थोक व्यवसायी संघ, काठमाडौंका अध्यक्ष अमन बानियाँले जानकारी दिए।
'दैनिक १५ देखि २० लाखको खर्बुजा र २० लाखको मेवा खपत हुन्छ,' उनले भने, 'तर त्यो सबै पैसा भारतमा जान्छ।'
नेपाली उपभोक्ताले गर्मी मौसममा यसको उपभोग गर्छन्। यो समयमा थोरै मात्रामा नेपाली उत्पादन पनि आउने गरेको छ।
बाह्रै महिना ठूलो परिमाणमा मेवा, खर्बुजा खपत हुने भएपनि स्वदेशमा भने यसको उत्पादन नगन्य मात्रामा भएको उनको भनाइ छ।
सरकारले मेवा तथा खर्बुजा उत्पादनमा प्रोत्साहन गर्न सके यहीका किसानलाई फाइदा पुग्ने उनी बताउँछन्।
'मेवाको उत्पादन हाम्रोमा नगन्य मात्रामा छ। खर्बुजा भने वैशाखदेखि असारसम्म स्वदेशी उत्पादन आउँछ,' उनले भने।
खर्बुजा पनि यहाँ भारतीय किसानले नै लगाएको उनी बताउँछन्।
हाल कालीमाटी बजारमा मेवा प्रतिथोक मूल्य ४० देखि एक सय रूपैयाँमा बिक्री भइरहेको छ।
त्यस्तै, खर्बुजा भने प्रतिकिलो ५० देखि ६० रूपैयाँमा बिक्री भइरहेको छ।
