पुल भासिएपछि दुम्कीबासमा लामो जाम (तस्बिरहरू)

सेतोपाटी संवाददाता

काठमाडौं, पुस २७

नवलपरासी पूर्व नवलपुरको दुम्किबासमा पुल भाँचिएपछि शुक्रबार बेलुका पूर्वपश्चिम राजमार्गमा यातायात सञ्चालन ठप्प भएको थियो।

नवलपुरको विनयी त्रिवेणी गाउँपालिका दुम्किबासस्थित विनयी खोलामा रहेको पुल शुक्रबार साँझ भाँचिदा यातायात सञ्चालन पूर्णरूपमा रोकिएको थिए।

सडक अवरूद्ध हुँदा त्यस क्षेत्रमा लामो जाम भएको थियो भने यात्रुहरू अलपत्र परेका थिए।

नवलपुरका सहायक प्रमुख जिल्ला अधिकारी माधवप्रसाद शर्मा अनुसार पुल भासिपछि डाइभर्सन बनाएर रोकिएका गाडीहरूलाई वारपार गराइएको थियो।

डाइभर्सन बनेपछि बेलुकी ८ बजेदेखि सवारी साधन पास गराइएकामा ठूला सवारी साधनहरूले डाइभर्सन समेत भत्काएका थिए।

जसका कारण बिहानसम्म त्यस क्षेत्रमा सवारी साधनहरुको लामो जाम लागेको थियो।

बिहान रोकिएका सवारीलाई वैकल्पिक मार्गको प्रयोग गरी सञ्चालनमा ल्याइएको नवलपरासी पूर्वका प्रमुख जिल्ला अधिकारी अरूण पोख्रेलले बताए।

रोकिएका सवारीलाई वैकल्पिक मार्गको प्रयोग गरी गन्तव्यतर्फ पठाउने काम सुरू गरिएको उनले बताए। पुल तत्काल मर्मत असम्भव भएको र डाइभर्सन निर्माणको काम नहुँदासम्मका लागि वैकल्पिक मार्गको प्रयोग गरी रोकिएका सवारीलाई गन्तव्यतर्फ पठाउने काम गरिएको प्रमुख जिल्ला अधिकारी पोख्रेलले बताए।

रोकिएका सवारीलाई विनयी त्रिवेणी–२, ज्यामिरे भित्रीबाटो प्रयोग गरी त्रिवेणी क्रसर हुँदै गुम्बाचोकस्थित राजमार्गमा निस्कने प्रबन्ध गरिएको प्रमुख जिल्ला अधिकारी पोख्रेलले बताए।

करिब पाँच किलोमिटर घुम्नुपर्ने यो बाटोबाट साना सवारीलाई वारपार गराइएको छ। दोस्रो बाटोको रूपमा ज्यामिरे पेट्रोलपम्प नजिकैबाट सिजी चोक–डाँडाजोर–होङ्सी गेट हुँदै करिब १८ किलोमिटर घुमेर राजमार्ग पुग्ने गरी ठूला सवारीसाधन सञ्चालनको व्यवस्था गरिएको छ।

रातिको समय भएका कारण पुल नजिकै डाइभर्सन निर्माण गरी तत्काल यातायात सञ्चालन गर्न कठिन रहेको जिल्ला प्रहरी कार्यालय नवलपुरका प्रहरी नायब उपरीक्षक जेसी शाहले बताए।

विनयी खोलामा बनेको २४६ मिटरको पुल पूर्णरूपमा क्षति पुगेको छ। कृष्णनगर भन्सारबाट छुटेको एन एल ०१ ए एच ५१६९ नम्बरको शिवम् सिमेन्टको सामान बोकेको ६० टन क्षमताको ट्रक पुल पार गर्ने क्रममा बीच भागबाट पुल भाँचिएको हो। ट्रक पुलको बीच भागमा नै फसेको छ।

तस्बिरहरूः

dumkibas-(9)-ink-1736572054.jpeg