नेपाल उद्योग वाणिज्य महासंघको आयोजनामा भएको आर्थिक बहसमा महासंघका अध्यक्ष चन्द्रप्रसाद ढकालले पछिल्लो आन्दोलनले निजी क्षेत्रलाई बढी आहत पुर्याएको बताएका छन्।
प्रधानमन्त्री, तीन मन्त्रीसहित उच्चपदस्थ अधिकारी र निजी क्षेत्रका प्रतिनिधिको उपस्थितिमा भएको बहसमा ढकालले लुटपाट, आगजानी र तोडफोडका घटनाको समीक्षा गर्नुपर्नेमा जोड दिए।
'यो पटकको आन्दोलनमा निजी क्षेत्रलाई बढी आहत भएको छ। लुटपाट, आगजानीका घटना पछि सबैले समीक्षा गर्नुपर्छ,' उनले भने।
उनले नाफा कमाउनुलाई गलत चित्रण गरिएको भन्दै आगजानी र तोडफोड गर्नेमाथि कारबाही नभए दण्डहीनता बढ्ने चेतावनी दिए।
खासगरी भदौ २४ गते भएको प्रदर्शनका क्रममा कुल ४८ अर्ब रुपैयाँ बराबरको भौतिक क्षति भएकोमा निजी क्षेत्रले मात्र ८८ अर्ब रुपैयाँको नोक्सानी ब्यहोरेको ढकालले जानकारी गराए।
'भदाै २४ को प्रदर्शनको क्रममा ४८ अर्बको भाैतिक क्षति सहित निजी क्षेत्रको ८८ अर्बको क्षति भएको छ,' उनले भने।
फेरि आन्दोलन भए थप नोक्सानी बढ्ने उनको भनाइ थियो।ढकालले अर्थतन्त्रमा निजी क्षेत्रको ८१ प्रतिशत र रोजगारीमा ८६ प्रतिशत योगदान रहेको स्मरण गराउँदै गरिखाने वर्गले सुरक्षित रूपमा काम गर्ने वातावरण पाउनुपर्ने बताए।
क्षतिलगत्तै ल्याइएको प्याकेजले पुनर्निर्माणमा सहयोग पुग्ने अपेक्षा उनले व्यक्त गरे।
महासंघले आर्थिक पुनरुत्थान र पुनर्निर्माणका लागि छुट्टै प्याकेज तयार पार्दै गरेको पनि उनले जानकारी गराए।
उनले विद्युत् महसुल विवाद समाधानका लागि भएको प्रयास सकारात्मक रहेको बताए।
सुशासन कायम गर्न निजी क्षेत्रको सहभागितामा संयन्त्र गठन गर्न, व्यवसाय दर्ता नागरिक एपबाटै गर्न मिल्ने व्यवस्था गर्न र पूर्वाधार निर्माणमा तीव्रता दिन संयन्त्र बनाउन आग्रह गरे।
राज्यले स्वीकृति दिएका परियोजनामा कुनै अवरोध नहुने सुनिश्चितता खोज्दै कतिपय परियोजनामा लागतभन्दा बढी रकम स्थानीय अवरोध हटाउन खर्च हुने गरेको उनले बताए।
आयकर र मूल्य अभिवृद्धि करको दर घटाउन, सीमा क्षेत्रमा अवैध आयात रोक्न र गिटी, ढुंगा, बालुवा समयमै वातावरणीय क्षति नहुने गरी निर्यात गर्न दिनुपर्ने ढकालको माग थियो।
उनले निजी क्षेत्र र गैरआवासीय नेपालीको १० अर्ब पुँजीको नेपाल डेभलपमेन्ट क्यापिटल कम्पनी स्थापना भएको र यसले ४० अर्ब बराबरको पुँजी परिचालन गर्न सक्ने बताए।
'सम्पूर्ण रूपमा शान्ति र स्थायित्वका लागि निजी क्षेत्र समयमै निर्वाचन होस् भन्ने अपेक्षा राख्छ ,' उनले भने।
-1746009348.jpg)
