सहरी विकास मन्त्रालयले कांग्रेसका संस्थापक नेता गणेशमान सिंहको नाममा बनाइने स्मृति भवनदेखि लिएर विभिन्न पूर्वाधारहरू निर्माण गर्न ७८ करोड रूपैयाँ बजेट विनियोजन गरेको छ।
आगामी आर्थिक वर्ष २०८२/८३ को बजेटमा सिंहको नाममा पार्क, स्मृति भवन, खानेपानी ट्यांकी, अध्ययन प्रतिष्ठान तथा सडक पूर्वाधार निर्माणसम्मका योजनाहरू अघि सारिएका छन्।
मन्त्रालयले छुट्टाछुट्टै शीर्षकमा देशभर ४५ वटा योजना अघि बढाएको छ। ती योजनाहरूको बजेट १३ लाखदेखि ८ करोड रूपैयाँसम्मको छ, जसमा केही पुराना तथा अधिकांश नयाँ कार्यक्रमहरू समावेश छन्।
गणेशमान सिंहलाई नेपाली कांग्रेसमा 'सर्वोच्च नेता', 'लौहपुरुष' र 'सर्वमान्य नेता'को रूपमा स्मरण गरिन्छ।
अहिले उनै सिंहका छोरा प्रकाशमान सिंह उपप्रधानमन्त्री तथा सहरी विकास मन्त्रीका रूपमा सरकारमा छन्।
उनी नेतृत्वमा रहँदा कांग्रेस पार्टीका कार्यकर्ता र शुभेच्छुक संस्थाहरूले सिफारिस गरेका योजनाहरूको पनि बजेटमा समावेश गरिएको छ।
कांग्रेसको भ्रातृ संगठन नेपाल तरुण दलको सिफारिसमा काठमाडौं महानगरपालिका–१३ मा निर्माण हुन लागेको गणेशमान सिंह स्मृति भवनका लागि ३ करोड रूपैयाँ बजेट छुट्याइएको छ। उक्त निर्णयप्रति आभार प्रकट गर्दै तरुण दलले विज्ञप्ति जारी गरेको छ।
काठमाडौंमा मात्रै सिंहको नाममा १३ वटा छुट्टाछुट्टै शीर्षकमा बजेट विनियोजन गरिएको छ। सातै प्रदेशका विभिन्न जिल्लामा सिंहको नाममा कुनै न कुनै योजना छुट्याइएको मन्त्रालयले जनाएको छ।
पार्क र बगैँचा निर्माणमा ठूला रकम
देशभर गणेशमान सिंह पार्क निर्माण र रहेका पार्कहरूको स्तरोन्नतिका लागि ३५ करोड ७२ लाख रूपैयाँ विनियोजन गरिएको छ। गणेशमान सिंह पार्कसम्बन्धी पूर्वाधार निर्माणका लागि मात्र २२ वटा शीर्षकमा बजेट छ।
उदाहरणका लागि काठमाडौंको जहरसिंहपौवामा निर्माण हुने गणेशमान सिंह पार्क तथा स्टेडियमका लागि आवश्यक सम्पूर्ण इन्जिनियरिङ कार्यहरू गर्न ३५ लाख ९६ हजार, सोही पार्कको गुरुयोजना तथा आर्किटेक्चरल डिजाइन तयार गर्न १८ लाख, वातावरणीय अध्ययन गर्न १३ लाख ५० हजार र निर्माण कार्यका लागि ४ करोड रूपैयाँ छुट्याइएको छ।
यी चार शीर्षकमा गरी ४ करोड ६७ लाख रूपैयाँ बजेट विनियोजन भएको हो।
त्यस्तै, पाँचथर, धनुषा, बारा, ललितपुर, भक्तपुर, काभ्रेपलाञ्चोक, कैलालीलगायत विभिन्न जिल्लाका पालिकाहरूका वडाहरूमा पार्क तथा बगैँचा निर्माणका लागि पनि बजेट विनियोजन गरिएको छ।
अध्ययन प्रतिष्ठान र स्मृति भवनहरू
गणेशमान सिंह अध्ययन प्रतिष्ठानका लागि झापा, काठमाडौं र दाङमा ६ वटा आयोजना अघि सारिएका छन्, जसका लागि ८ करोड ५० लाख रूपैयाँ विनियोजन गरिएको छ।
त्यसैगरी, सिंहको नाममा काठमाडौं, कास्की, दैलेख, सुर्खेत, रुकुम (पश्चिम), सिन्धुपाल्चोक, बझाङ र अछाममा १० वटा स्मृति भवन निर्माण तथा पूर्वाधार स्तरोन्नतिको लागि १६ करोड ५ लाख रूपैयाँ बजेट राखिएको छ।
सिंहको नाममा लोकमार्ग, रंगशाला, खानेपानी ट्यांकी तथा बाटो स्तरोन्नतिका लागि थप १७ करोड ६५ लाख रूपैयाँ छुट्याइएको छ।
गणेशमान सिंह मात्र नभई सरकारले राजनीतिक परिवर्तनमा योगदान पुर्याएका नेताहरूको नाममा पनि विभिन्न पूर्वाधार निर्माण गर्दै आएको छ।
पछिल्लो केही वर्षयता संघीय सरकारले स्मृति भवन, अध्ययन प्रतिष्ठान लगायतका पूर्वाधारहरूका लागि ठूला बजेट विनियोजन गर्ने क्रम बढ्दो छ।
सहरी विकास मन्त्रालयले गणेशमान सिंहको जस्तै बिपी कोइराला, गिरिजाप्रसाद कोइराला, सुशील कोइराला, मदन भण्डारीलगायत नेताहरूको नाममा पनि स्मृति भवन तथा अन्य पूर्वाधार निर्माणका लागि बजेट राखेको छ।
यो पनि:
कहाँ खर्च गर्दैछ सहरी विकास मन्त्रालयले एक खर्ब १८ अर्ब रूपैयाँ बजेट?
