रूपन्देहीमा अर्को पनि सहकारी संस्था संकटमा परेको छ। तिलोत्तमा नगरपालिका- ३ सिर्जना चोकस्थित श्री डिङ्गरनगर दूरगामी बचत तथा ऋण सहकारी संस्थाले बचतकर्ताहरूको करिब २५ करोड रकम अपचलन गरेको आशंका गरिएको छ।
२०५० सालमा स्थापना भएको सहकारी संस्थामा हाल करिब दुई हजार सदस्य रहेका छन्।
कूल ३८ करोड पुँजी रहेको सहकारी संस्थाका अध्यक्ष, सचिव र व्यवस्थापक मोबाइल स्विच अफ गरेर सम्पर्कविहीन भएका छन्।
सहकारीका अध्यक्ष, सचिव र व्यवस्थापक सम्पर्कविहीन भएपछि बचतकर्ताहरूले मंगलबार सहकारीको कार्यालय घेराउ गरेका थिए।
बचतकर्ताहरूले कार्यालय घेराउ गरेपछि सहकारीका अन्य पदाधिकारी तथा सदस्यहरूको निर्णयमा प्रहरी र वडा कार्यालयको रोहवरमा मंगलबार सहकारीको कार्यालय सिल गरिएको छ।
सहकारीका घनश्याम तिवारी अध्यक्ष, रामबहादुर क्षेत्री सचिव र वसन्त पराजुली व्यवस्थापक रहेका छन्। उनीहरू तीनै जना सम्पर्कविहीन छन्।
तिलोत्तमा नगरपालिका- ३ का वडाध्यक्ष कल्याण पौडेलले सहकारीका पदाधिकारी सम्पर्कविहीन भएपछि सहकारीमा थप हिनामिना नहोस् भनेर सञ्चालक समिति र वडा कार्यालयकै रोहबरमा कार्यालय सिल गरेको जानकारी दिए।
'जिम्मेवार व्यक्तिहरू सम्पर्कमा नरहेको र करिब २ हजार सर्वसाधारणको बचत रहेको संस्थामा थप क्षति नहोस् भनेर सहकारीका अन्य पदाधिकारीहरूको निर्णय र प्रहरीकै रोहबरमा मंगलबार राति १ बजेतिर कार्यालय सिल गरिएको हो,' वडाध्यक्ष पौडेलले भने।
सहकारीमा कुल कति रकम बचत थियो र कति सदस्य आबद्ध थिए भन्ने यकिन भएको छैन। तर अन्य पदाधिकारीका अनुसार २२ देखि २५ करोड रुपैयाँसम्म हिनामिना भएको हुनसक्ने अनुमान भएको वडाध्यक्ष पौडेलले बताए।
'सहकारीको कति रकम हिनामिना भएको छ भन्ने कुरा सबै कागजात हेरेपछि मात्रै थाहा होला हामीलाई प्राप्त भएको जानकारी अनुसार २२ देखि २५ करोडसम्म हिनामिना प्रारम्भिक अनुमान छ,' उनले भने।
सहकारीको रकम अपचलन भएको आशंका पाएपछि पछिल्लो एक सातादेखि सयौं बचतकर्ताहरूले रकम फिर्ताको माग गर्दै निवेदन दिएका छन्।
रकम अपचलनको सूचना बाहिरिएपछि केही दिन पहिले समितिका पदाधिकारी र सल्लाहकारले आन्तरिक रूपमा मिलाउने प्रयास समेत गरेका थिए। तर, पदाधिकारी र सल्लाहकारले बैठकमा गरेको सहमतिको माइन्युटलाई अध्यक्ष र सचिवले च्यातेर हिँडेपछि सहकारीको रकम हिनामिना छताछुल्ल बनेको हो।
बचत संकलन तथा ऋण परिचालनसँगै दुग्धजन्य पदार्थको बिक्री वितरण गर्दै आएको सहकारीले सिर्जना नगरस्थित आफ्नै भवनमा कार्यालय सञ्चालन गर्दै आएको थियो।
इलाका प्रहरी कार्यालय बुटवलका प्रमुख प्रहरी नायब उपरीक्षक इन्द्र रानाले सहकारीका केही सञ्चालक र बचतकर्ताहरूले सहकारीको बचत हिनामिना गरी अध्यक्ष, सचिव र व्यवस्थापक फरार भएको भन्दै निवेदन दिएको बताए।
सहकारीका बचतकर्ताहरूले आफूहरूको बचत रकम अध्यक्ष, सचिव र व्यवस्थापकले हिनामिना गरेको भन्दै छानबिनको लागि प्रदेश सहकारी रजिष्ट्रारको कार्यालयमा पनि निवेदन दिएको बताएका छन्।
-1746009348.jpg)
