आर्थिक वर्ष २०७८/०७९ मा वैदेशिक रोजगारमा जान श्रम स्वीकृति लिनेको संख्या ६ लाख नाघेको छ।
असार ३० गतेसम्मको वैदेशिक रोजगार विभागको तथ्यांकअनुसार ६ लाख २८ हजार ५०३ जनाले नयाँ तथा पुनः श्रम स्वीकृति लिएका हुन्। यो संख्या आर्थिक वर्ष २०७४/०७५ देखि हालसम्मकै उच्च भएको विभागले बताएको छ।
विभागको तथ्यांक हेर्ने हो भने चार वर्ष निरन्तर ओरालो लागेको वैदेशिक रोजगारीमा जानेको संख्या यो वर्ष बढेको देखिन्छ। आर्थिक वर्ष २०७४/०७५ मा पाँच लाख ७९ हजार ७२१ पुरुष र ३२ हजार ९६४ महिला गरी ६ लाख १२ हजार ६८५ जनाले नयाँ तथा पुनः श्रम स्वीकृति लिएको देखिन्छ।
आर्थिक वर्ष २०७३/०७४ को तुलनामा आव २०७४/०७५ मा वैदेशिक रोजगारमा जानेको संख्या २९ हजार ४११ कम थियो। त्यसयता २०७७/०७८ सम्म वैदेशिक रोजगारीमा जानेको संख्या निरन्तर घट्दै गएको तथ्यांकले देखाउँछ।
तालिकामा हेरौं आर्थिक वर्ष ०७३/०७४ देखि ०७८/०७९ सम्मको तथ्यांक
आर्थिक वर्ष २०७७/०७८ को तुलनामा २०७८/०७९ मा वैदेशिक रोजगारमा जानेको संख्या चार लाख ६१ हजार ८०५ बढेको छ। लिंगका आधारमा हेर्ने हो भने महिलाको संख्या अत्यन्तै कम देखिन्छ। २०७८/०७९ मा ५ लाख ७९ हजार ५२८ पुरुषले श्रम स्वीकृति लिएका छन् भने महिला ४८ हजार ९७५ जना मात्र छन्। यो नयाँ तथा पुनः श्रम स्वीकृति दुवै लिनेको संख्या हो। नयाँ श्रम स्वीकृति तीन लाख १४ हजार ५४८ जना पुरुषले र ३२ हजार ९५६ महिलाले लिएका छन्।
सरकारले श्रमिकहरूलाई मलेसिया तथा खाडी मुलुकमा घरेलु कामदारमा नयाँ श्रम स्वीकृति लिएर जान रोक लगाएका कारण यो संख्या कम भएको विभागको भनाइ छ। सरकारले वैधानिक बाटो बन्द गरे पनि अवैध बाटो र प्रक्रियामार्फत ठूलो संख्यामा महिलाहरू घरेलु कामदारको रूपमा जाने गरेका छन्। घरेलु कामका लागि स्वीकृति लिएर गएकालाई सरकारले पुनः श्रम स्वीकृति भने जारी गर्दै आएको छ।
पहिलो रोजाइ साउदी अरब
आर्थिक वर्ष २०७८/०७९ मा नेपाली युवाहरूले लिएको श्रम स्वीकृतिका आधारमा विभागले दस प्रमुख गन्तव्य मुलुकको सूची तयार गरेको छ। सूचीअनुसार पहिलो रोजाइमा साउदी अरब परेको छ। साउदी जान सबैभन्दा धेरै, एक लाख ८८ हजार ३९८ जनाले श्रम स्वीकृति लिएका छन्।
साउदीपछि धेरे नेपाली कतार पुगेका छन्। कतारका लागि एक लाख ८४ हजार ५०३ जनाले श्रम स्वीकृति लिएका छन्।
त्यसपछि क्रमशः संयुक्त अरब इमिरेट्स (युएई), कुवेत, मलेसिया, बहराइन, रोमानिया, जापान र क्रोएसिया परेका छन्।
युएईका लागि एक लाख २२ हजार ३६६, कुवेतका लागि ३५ हजार ४४८, बहराइनका लागि १२ हजार ४०, रोमानियाका लागि सात हजार ४०२, ओमानका लागि छ हजार ८३८, जापानका लागि पाँच हजार ६२९ र क्रोएसियाका लागि पाँच हजार २८६ जनाले श्रम स्वीकृति लिएका छन्।
कोभिड महामारीका कारण मलेसियाले लामो समय नेपाली लगायत आप्रवासी श्रमिक प्रवेशमा कडाइ गरेकाले ठूलो संख्यामा नेपाली श्रमिक साउदी पुगेको विभागका महानिर्देशक शेषनारायण पौडेल बताउँछन्।
'अब मलेसिया सहज हुन थालेको छ। योसँगै साउदीबाट फर्केर पनि युवाहरू मलेसिया जान चाहिरहेका छन्,' पौडेलले भने, 'साउदीमा पारिश्रमिक तथा सेवा-सुविधामा पनि समस्या बढेको पाइएको छ।'
साउदीको तुलनामा मलेसियामा आकर्षक सेवा-सुविधा पाइने भएकाले पनि नेपाली युवाहरू मलेसिया नै जान खोज्छन्। यो वर्ष मलेसिया प्रमुख आकर्षक गन्तव्य मुलुक बन्ने आकलन छ।
महिलाहरूको प्रमुख गन्तव्य मुलुक युएई
विभागका अनुसार महिला श्रमिकको प्रमुख गन्तव्य मुलुक भने युएई बनेको छ। युएईका लागि २१ हजार ११० जना महिलाले श्रम स्वीकृति लिएका छन्। त्यस्तै कतारका लागि सात हजार १२२, कुवेतका लागि पाँच हजार ३३९, साइप्रसका लागि तीन हजार ६ सय ३८, मलेसियाका लागि एक हजार ३९७ महिलाले श्रम स्वीकृति लिएका छन्।
माल्दिभ्स, क्रोएसिया, बहराइन, जोर्डन र रोमानियाका लागि पनि ठूलो संख्यामा महिलाहरूले श्रम स्वीकृति लिएका छन्। माल्दिभ्सका लागि एक हजार १६०, क्रोएसियाका लागि एक हजार ९९, बहराइनका लागि एक हजार दुई, जोर्डनका लागि ९३२ र रोमानियाका लागि ८९५ जनाले श्रम स्वीकृति लिएका छन्।
हालसम्म वैदेशिक रोजगारमा जान ७१ लाखले लिए स्वीकृति
विभागले २०५० सालदेखि वैदेशिक रोजगारमा जानेको तथ्यांक राख्न सुरू गरेको हो। तथ्यांक राख्न सुरू गरेदेखि हालसम्म ७१ लाख २० हजार ३१९ जनाले श्रम स्वीकृति लिएका छन्। श्रम स्वीकृति लिनेमा ६७ लाख ८७ हजार २८५ पुरुष र तीन लाख ३३ हजार ३४ जना महिला छन्।
