भारतले नेपाललाई थप १० वटा बेलिब्रिज (फलामे पुल) अनुदानमा दिएको छ।
भारी वर्षाबाट आएको बाढी पहिरोका कारण क्षति पुगेका सडक सञ्जाललाई नियमित रूपमा सञ्चालनका लागि भारतले यस वर्ष नेपाललाई अनुदानमा थप १० वटा बेलिब्रिज दिएको हो।
भारतले गत वर्ष १० वटा बेलिब्रिज दिएको थियो। सरकारको अनुरोधमा भारतले बेलिब्रिज अनुदानमा उपलब्ध गराएको हो।
भारतले उपलब्ध गराउने १० वटामध्ये एउटा बेलिब्रिज बिहीबार नेपाललाई हस्तान्तरण गरिएको छ। बाँकी नौ वटा एक हप्ताभित्र नेपाल आइपुग्ने छन्।
नेपालका लागि भारतीय राजदूत नवीन श्रीवास्तवले बिहीबार हेटौंडामा ऊर्जा जलस्रोत तथा सिँचाइ, भौतिक पूर्वाधार तथा यातायात र शहरी विकासमन्त्री कुलमान घिसिङलाई ब्रिज हस्तान्तरण गरे।
उक्त ब्रिजको लम्बाइ ७० मिटर छ। चौडाइ सिंगल लेन ४.२५ मिटर छ। पुलको भारबहन क्षमता ३८ मेट्रिक टन छ।
पुल हस्तान्तरण समारोहमा मन्त्री घिसिङले नेपाल प्राकृतिक विपद्को संकटमा रहेका बेला भारतले उपलब्ध गराएको सहायतले क्षति पुगेका पूर्वाधार छिटो पुनर्स्थापना गरी सडक सञ्जाल सहज बनाउन महत्वपूर्ण रहेको बताए।
मन्त्री घिसिङले संकटका समयमा उपलब्ध गराएको सहायताले द्धिपक्षीय साझेदार अझै दह्रो देखिएको बताए। उनले भारतले नेपाललाई गर्दै आएको निरन्तर सहायोगका लागि धन्यवाद समेत दिए।
नेपालका लागि भारतीय राजदूत श्रीवास्तवले नेपालको कठिन समयमा सहयोग गर्न सँधै तयार रहेको बताए। उनले पुल जडानका लागि छिटै प्राविधिक टोली पनि आउने जानकारी गराए।
-1746009348.jpg)
