सिन्धुली र रामेछापको सीमा रहेको सुनकोशी नदीको खैरेनीघाटमा बेलिब्रिज (फलामे पुल) जडान सुरू भएको छ।
गत वर्षको असोजको भारी वर्षाका कारण रोशीखोला र सुनकोशी नदीमा आएको बाढीले नेपालथोक नजिक खैरेनीघाटको पक्की पुललाई क्षति पुर्याएपछि उक्त स्थानमा बेलिब्रिज जडान गर्न लागिएको हो। उक्त स्थानमा ७० मिटर लम्बाइ भएको बेलिब्रिज जडान हुनेछ। सिंगल लेन पुलको भार वहन क्षमता २० टन छ।
विपदबाट क्षति पुगेका सडक सञ्जाललाई नियमित सञ्चालनका लागि सरकारको अनुरोधमा भारतले उक्त ब्रिज अनुदानमा उपलब्ध गराएको हो। भारतले अनुदानमा उपलब्ध गराएका १० वटा मध्ये एउटा खैरेनीघाटमा जडान गर्न लागिएको हो।
ब्रिज खैरेनीघाटसम्म ढुवानी भइसकेको छ। जडानका लागि प्राविधिकहरू भारतबाट निर्माणस्थलमा पुगिसकेका छन्। बाढीले पुलसम्म पुग्ने सडक क्षति पुर्याएको थियो। उक्त स्थलसम्म पुग्ने सडकको ट्रयाक खोल्ने काम सम्पन्न भइसकेको छ।
ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकासमन्त्री कुलमान घिसिङले बिहीबार खैरेनीघाट क्षेत्रको स्थलगत निरीक्षण गरी ब्रिज जडानका बारेमा जानकारी लिए।
मन्त्री घिसिङले विपद्का कारण पुलमा क्षति पुग्दा रामेछापका सुनापति, खाँडादेवी, दोरम्बा, काभ्रेपलाञ्चोकको चौँरी देउराली लगायतका क्षेत्रको तराई र काठमाडौंसँग सडक सम्पर्क टुटेको र आवातजावतमा कठिनाई भएकाले ब्रिज जडान जतिसक्दो छिटो सम्पन्न गर्न निर्देशन दिए।
-1746009348.jpg)
