राष्ट्रिय पुनर्निर्माण प्राधिकरणले चार वर्षमा २ खर्ब ९३ करोड खर्च भएको बताएको छ।
प्राधिकरण निर्माणको चार वर्ष पुगेको अवसरमा आयोजित कार्यक्रममा ६९ प्रतिशत भवनको पुननिर्माण सकिएको बताएको हो।
भुकम्पबाट सबैभन्दा बढी क्षती भएका निजी आवास, विद्यालय, स्वास्थ्य संस्था, सम्पदा, सरकारी भवनहरु र सुरक्षा निकायका भवनहरुको पुनर्निर्माण १४ प्रतिशत काम भइरहेको र १७ प्रतिशत काम नै सुरु नभएको प्राधिकरणको भनाइ छ।
निजी आवास पुनर्निर्माणका लागि अनुदान सम्झौता भएका कुल ७ लाख ८० हजार १ सय ६५ लाभग्राहीमध्ये हालसम्म ४ लाख ८२ हजार ३ सय २३ घरको पुनर्निर्माण सम्पन्न भइसकेको छ। जुन अनुदान सम्झौता गरेका उल्लेखित लाभग्राहीको ६२ प्रतिशत हो। १ लाख ८९ हजार ४१ वटा घर बन्दैछन्, यो २४ प्रतिशत हो।
क्षतीग्रस्त ७ हजार ५ सय ५३ विद्यालयमध्ये ५ हजार ३ सय ८० अर्थात ७१ प्रतिशत पुनर्निर्माण सम्पन्न भएको छ। १७ सय ८७ विद्यालयको पुनर्निर्माण भइरहेको प्राधिकरणले जानकारी दियो।
३२ जिल्लाका ८ सय ९१ सम्पदामध्ये ३ सय ८७ वटा सम्पदाहरुको पुनर्निर्माण सम्पन्न भइसकेको छ। १ सय २३ वटा सम्पदा पुनर्निर्माणको क्रममा छन्।
कुल ११ सय ९७ वटा मध्ये ६ सय ६५ स्वास्थ्य संस्थाहरुको पुनर्निर्माण सकियो भने १ सय ४९ वटा बन्दैछन्।
पूर्ण र आंशिक रुपमा क्षती भएका कुल ४ सय १५ सरकारी भवनमध्ये ३ सय ५९ वटा सरकारी भवनको पुनर्निर्माण सम्पन्न भइसकेको र ४९ वटाको काम चलिरहेको छ।
सुरक्षा निकायका १ सय ८३ वटा संरचनाहरुको पुनर्निर्माण सम्पन्न भइसकेको छ भने ३२ वटा बन्दैछन्।
पुनर्निर्माणका क्रममा विभिन्न जिल्लामा ७ सय ६२ किलोमिटर सडक पुनर्निर्माण गर्नुपर्नेमा ४ सय ४३ किलोमिटर सडकको पुनर्निर्माण सम्पन्न भइसकेको छ। बाँकी ३ सय १९ किलोमिटर सडकको पुनर्निर्माण भइरहेको प्राधिकरणको तथ्याङ छ।
चार वर्षमा स्वयम्भुको प्रतापपुर, अनन्तपुर, बौद्ध स्तूपा, पाटनको कृष्ण मन्दिर, हनुमान ढोकाको गद्दि बैठक, साँखुको बज्रयोगिनी, प्रसुति गृह, वीर अस्पताल, नेपाली सेनाको जंङ्गीअड्डा लगायतको पुनर्निर्माण सम्पन्न भएको छ। धरहरा, रानीपोखरी, काष्ठमण्डप, बसन्तपुर दरबार, नुवाकोट दरबार, सिंहदरबार (उत्तर, पूर्व, दक्षिण र पश्चिम भाग) दरबार हाइस्कूल जस्ता मुख्य संरचनाहरुको पुनर्निर्माण भने बाँकी छन्।
-1746009348.jpg)
