फिनटेक अलायन्स नेपाल (फन) ले एसिया फिनटेक अलायन्स (एएफए) को सदस्यता प्राप्त गरेको छ ।
नेपालमा फिनटेक इनोभेसन र डिजिटल वित्तीय समावेशीकरणका लागि फिनटेक अलायन्स नेपालले नेतृत्वदायी भूमिका निर्वाह गर्दै आइरहेको छ।
यो सँगै फिनटेक अलायन्स नेपालले एसिया फिनटेक अलायन्सको नेटवर्कभित्र एसियाभरका प्रख्यात फिनटेक एसोसिएसनहरूसँग एउटै मञ्चबाट सहकार्य गर्न पाउने भएको हो।
यो साझेदारीले नेपाली फिनटेक कम्पनी र यो क्षेत्रमा आबद्ध पेसाकर्मीको एसिया प्रशान्त क्षेत्रका फिनटेक संघ संस्थासँग सहकार्य र साझेदारी बढाउन, उत्कृष्ट अभ्यासहरू आदान प्रदान गर्न र सामूहिक वृद्धिलाई अगाडि बढाउन सहज हुने विश्वास गरिएको छ।
एसिया फिनटेक अलायन्सले सिङ्गापुर, दक्षिण कोरिया, जापान, फिलिपिन्स, ताइवान, इन्डोनेसिया, हङकङ, मलेसिया, थाइल्यान्ड, मङ्गोलिया र अहिले नेपाल जस्ता प्रमुख बजारहरूबाट फिनटेक एसोसिएसनका विविध समूहलाई एकसाथ ल्याएको बताइएको छ।
यस सहकार्यले फनलाई नेपालको फिनटेक इकोसिस्टमको विकासलाई गति दिँदै क्षेत्रभरका अन्तर्दृष्टि र विशेषज्ञताको लाभ उठाउने राम्रो अवसर दिएको छ।
'हामी एसिया फिनटेक गठबन्धनमा सामेल हुन पाउँदा र एसियाभरका सम्मानित फिनटेक संघहरूसँग सहकार्य गर्न पाउँदा अत्यन्त सम्मानित महसुस गरिरहेका छौं,' फनका अध्यक्ष सञ्जीव सुब्बाले भने, 'यो साझेदारी नेपालमा फिनटेक नवप्रवर्तन र डिजिटल वित्तीय समावेशीकरणको हाम्रो दृष्टिकोणसँग मिल्दोजुल्दो छ, र हामी एसियाली फिनटेक समुदायको सामूहिक वृद्धिमा योगदान दिन पाउँदा उत्साहित छौं।'
'हामी विश्वास गर्दछौं कि एसियामा हाम्रा समकक्षीहरूसँग मिलेर काम गरेर, हामीले नयाँ अवसरहरू पहिचान गर्न सक्छौं, साझा चुनौतीहरूलाई सम्बोधन गर्न सक्छौं र फिन्टेक परिदृश्यमा प्रभावकारी ल्याउन सक्छौं,' फनका प्रवक्ता विकास सरनले भने।
फिनटेक एलायन्स नेपाल नेपालमा फिनटेक नवप्रवर्तन, उद्यमशीलता र डिजिटल वित्तीय समावेशीकरणलाई प्रवर्द्धन गर्न समर्पित एक अग्रणी फिनटेक संगठन हो।
यसले स्टार्टअप, वित्तीय संस्था, नियामक र प्रविधि प्रदायक लगायत फिनटेक सरोकारवालाबिच सहकार्यमा सकारात्मक परिवर्तन ल्याउन र नेपालको विकसित वित्तीय परिदृश्यमा फिनटेकको पूर्ण सम्भावनाको ढोका खोल्न उत्प्रेरकको रूपमा काम गर्दै आएको छ।
