अन्तर्राष्ट्रिय पर्यटन दिवसको अवसरमा एक सय जनाको 'गोल्डेन ट्र्यांगल बाइक टूर' हुने भएको छ।
नेपाल टुरिजम फेस्टिभलको दोस्रो संस्करणको तयारी स्वरूप एनटिपी मल्टिमिडिया ग्रुपले एक्सपल्स राइडर्स क्लबसँग मिलेर पहिलोपटक यो 'गोल्डेन ट्र्यांगल बाइक टूर' आयोजना गर्न लागेको हो। बाइक टूरको सह–आयोजकमा मुकाम मिडिया नेटवर्क र हिमाल मल्टिमिडिया छन्।
नेपाल पर्यटन बोर्ड, नाट्टा, टान, एफएनसिसिआई लगायत संघ-संस्थासँगको समन्वय तथा सहकार्यमा पत्रकार, कलाकार, साहित्यकार, बाइकरसहित एक सय जनाको राइडर्स टिमले काठमाडौं–हेटौंडा–चितवन–लुम्बिनी–पाल्पा–पोखरा रूटमा 'गोल्डेन ट्र्यांगल बाइक टूर' गर्न लागिएको हो।
यसअघि ताप्लेजुङ–दार्चुला बाइक टूर सफलतापूर्वक सम्पन्न गरेको एनटिपी मल्टिमिडिया ग्रुपले यसपटक कोभिड महामारी र आर्थिक मन्दीपछि सुस्त देखिएको पर्यटन क्षेत्रलाई उकास्न सहयोग पुग्ने उद्धेश्यले काठमाडौं–चितवन–लुम्बिनी–पोखरालाई केन्द्रमा राखेर एक सय जना राइडर्ससहितको गोल्डेन ट्र्यांगल बाइक टूर आयोजना गरेको संयोजक विष्णु विवेकले बताए।
'अन्तर्राष्ट्रिय पर्यटन दिवसको अवसरमा सय जनाको राइडर्स टिमसहित पत्रकार, कलाकार, साहित्यकार र बाइकर मिलेर गोल्डेन ट्र्यांगल बाइक टूर गर्न लागेका हौं,' उनले भने, 'यसले नेपालमा पछिल्लो समय लोकप्रिय बन्दै गइरहेको बाइक टुरिङ र त्यसबाट नेपालका विविध पर्यटकीय गन्तव्य प्रवर्द्धन गर्न सहयोग पुग्छ। यसपटक हामी गोल्डेन ट्र्यांगलमा केन्द्रित छौं।’
अन्तर्राष्ट्रिय पर्यटन दिवसको दिन असोज १० (सेटेम्बर २७) देखि सुरू हुने बाइक टूरको टिम पहिलो दिन चित्लाङ, दामन हुँदै पर्सा राष्ट्रिय निकुञ्जको प्रवर्द्धनका लागि वीरगञ्ज पुग्नेछ। सोही दिन निकुञ्ज परिसरमा अन्तरक्रिया कार्यक्रम आयोजना गरेर पर्सा निकुञ्जको भ्रमण तथा पत्रकार, कलाकार, साहित्यकार र राइडर्सले पर्यटन प्रवर्द्धन गर्नेछ।
यसका लागि नाट्टा मधेस प्रदेश, भरतपुर महानगरपालिका र पर्सा राष्ट्रिय निकुञ्जसँग समन्वय तथा सहकार्य भइरहेको छ।
दोस्रो दिन असोज ११ गते पर्सादेखि हेटौंडा, सौराहा हुँदै राइडर्सको टिम भरतपुर पुग्नेछ। भरतपुर महानगरपालिकाको ‘भिजिट भरतपुर २०२४’ भ्रमण वर्ष कार्यक्रमलाई सहयोग तथा प्रवर्द्धन गर्न सयजनाको राइडर्स टिमले नारायणी किनारमा ‘बीच क्रिकेट’ पनि खेल्नेछन्। भरतपुरमा मेयर रेणु दाहाल लगायत सरोकारवालासँग अन्तरक्रिया गर्नेछ।
तेस्रो दिन असोज १२ गते राइडर्स टिम लुम्बिनी पुगेर शान्तिदीप प्रज्ज्वलन गर्नेछ।
भोलिपल्ट ऐतिहासिक जितपुरगढी किल्ला पुगेर त्यसको प्रवर्द्धन गर्नेछ। यसका लागि नाट्टा लुम्बिनी प्रदेश, बुटवल उपमहानगरपालिका र लुम्बिनी विकास कोषसँग सहकार्य तथा समन्वय भइरहेको संयोजक विवेकले जानकारी दिए।
चौथो दिन राइडर्स टोली पाल्पा रानीमहल पुग्नेछ। रानीमहलको पर्यटन प्रवर्द्धन तथा कार्यक्रमका लागि नाट्टा पाल्पा च्याप्टरको समन्वय तथा तानसेन नगरपालिकासँग सहकार्य हुनेछ। रानीमहलमा पर्यटन प्रवर्द्धनका साथै कालीगण्डकी किनारमा अन्तरक्रिया कार्यक्रम, भलिबल र डोरी तान्ने खेल अर्थात 'टग अफ वार' खेल पनि हुनेछ।
पाँचौ दिन सय जनाको राइडर्स टिम पोखरा पुग्नेछ।
पोखरामा आउँदो मङ्सिरमा हुने नेपाल टुरिजम फेस्टिभलको दोस्रो संस्करणको तयारी तथा ब्राण्डिङका लागि बाइक टूर टिमले लेकसाइडमा समापन कार्यक्रम गर्नेछ।
यसका लागि पोखरामा पर्यटन महिला व्यवसायी संघ, टेवान र नाट्टा गण्डकी प्रदेश लगायतका संघ संस्थासँग सहकार्य हुनेछ। पोखरामा फेवातालसँगै बेगनासताल र रुपातालको पनि पर्यटन प्रवर्द्धन गरेर राइडर्स टिम असोज १५ गते काठमाडौं फर्किनेछन्।
