६० किलो सुन तस्करी प्रकरणमा फरार प्रतिवादी रहेका जीवन चलाउनेले मिडियामा बोलेका विषय तथ्यका रूपमा लिन नसकिने बताएका छन्।
बुधबार राज्य व्यवस्था तथा सुशासन समितिमा जीवन चलाउनेले मिडियामा बोलेका कुरालाई पक्राउ नपर्दासम्म तथ्यको रूपमा लिन नसकिने बताएका हुन्।
सुनको अवैध पैठारी (तस्करी) सम्बन्धी जाँचबुझ आयोगले सरकारलाई बुझाएको प्रतिवेदनमा प्रहरीको केन्द्रीय अनुसन्धान ब्युरो (सिआइबी)ले जीवन चलाउनेसँग बयान कागज गराएर छाडेको उल्लेख छ।
त्यसपछि आफूसँग एआइजी श्याम ज्ञवालीले आइजी बन्न २ करोड रूपैयाँ मागेको भन्दै चलाउनेले अन्तर्वार्ता दिएको विषय समितिमा उठेको थियो।
आयोगले उठाएका विषय र मिडियामा बोलेका विषयमा सम्बोधन गर्दै आइजिपी कुँवरले त्यसलाई सतही कुरामात्रै भएको दाबी गरे।
‘यहाँ विभिन्न मान्छेको विभिन्न किसिमको स्वार्थहरू छन्। मिडिया तथ्य बिना सतहमा ल्याउने, प्रतिष्ठा के हो, इज्जत के हो, त्यो हिसाबको ध्यान नपुर्याएको कारणले यो समस्या आएका छन्। सम्बन्धित व्यक्ति जो हो, त्यो व्यक्ति पक्राउ नहुँदासम्म यी कुराहरूलाई तथ्यको रूपमा लिन सकिने अवस्था छैन,’ उनले भने।
त्यस्तै कल डिटेल रेकर्ड (सिडिआर) को फोटोहरू पनि बाहिरिएको विषयमा आइजी कुँवरले आन्तरिक छानबिन गर्ने बताए।
‘सिडिआर कसरी गयो भन्ने विषयमा पनि मैले हेरेँ। त्यो अत्यन्तै संवेदनशील छ। त्यो विषय कसरी गयो, कहाँबाट गयो, भन्ने विषयमा मेरो आन्तरिक छानबिनको विषय हुन्छ, गर्छु,’ उनले भने।