प्रधानमन्त्री केपी शर्मा ओलीले आफू केही समयमा भारतको भ्रमण गर्ने बताएका छन्।
आइतबार झापाको दमकमा आयोजित एक कार्यक्रममा बोल्दै उनले आफूले केही समयमा भारत भ्रमण गर्ने बताएका हुन्।
‘हामी देश बनाउँछौं। कर्णालीमा पुल बन्ने भएको छ। चीन भ्रमणबाट थुप्रै कुराहरू भएका छन्,’ उनले भने, ‘अब मान्छेहरूले पत्याएका छैनन् होला। म केही समयपछि भारत भ्रमणमा पनि जान्छु।’
त्यस्तै उनले सहकारी ठगी आरोपमा पक्राउ परी हिरासतमा रहेका राष्ट्रिय स्वतन्त्र पार्टीका सभापति रवि लामिछानेमाथि लक्षित टिप्पणी पनि गरे।
'देश चलाउन सिद्धान्त चाहिन्छ, नीति चाहिन्छ, संकल्प चाहिन्छ, अठोट चाहिन्छ, सहकारी ठगे जस्तो हुँदैन देश चलाउन भनेको,' उनले भने, 'अरूलाई बुरूक बुरूक्क उफ्रिएर मुख छोडे जस्तो हुँदैन, देश चलाउनलाई।’
प्रधानमन्त्री ओलीले नयाँ राजनीतिक शक्तिहरूलाई बाँसको झ्याङमा उम्रिएको नर्कटको संकेत समेत गरे। केहीबेर चम्किने र छिटै सेलाउने भन्दै प्रधानमन्त्री ओलीले कोही पनि नयाँ शक्तिबाट देश बन्ने भ्रममा नपर्न आग्रह गरे।
‘कहिले कहिले यस्तो लाग्छ बाँसको झ्याङको छेउमा एउटा नर्कट उम्रिन्छ। बाँसको टुसोभन्दा छिटो बढ्छ। बाँस अलि यत्रो हुँदा नर्कट अलि ठूलो भइसक्छ,' उनले भने, 'अर्को पल्ट हेर्न जाँदा नर्कट बुढो भएर ढलिसकेको हुन्छ। नयाँ नर्कट त्यस्तै हो। यी नर्कटहरू पुर्लक्क उम्रिन्छन्, अलि यत्रा हुन्छन् फेरि ढल्छन्।'
त्यस्तै, प्रधानमन्त्री ओलीले झुट, भ्रम फैल्याएर अराजकता मच्चाउनेलाई सरकारले नछोड्ने बताए।
लामिछानेमाथि जिल्ला प्रहरी कार्यालय कास्कीबाट सहकारी बचत रकम अपचलन, संगठित अपराध र सम्पत्ति शुद्धिकरण कसुरमा अनुसन्धान भइरहेको छ। कास्कीसहित चितवन, काठमाडौं, रूपन्देही र वीरगंजमा पनि अनुसन्धान जारी छ।
भिडिओः
