नेकपा (एकीकृत समाजवादी) का अध्यक्ष माधवकुमार नेपालले पार्टी सानो छ, चल्छ भन्नेजस्ता निराशावादी कुरा गर्नेहरूलाई मुखभरिको जबाफ दिनुपर्ने बताएका छन्।
शुक्रबार ललितपुरमा सुरू भएको केन्द्रीय कमिटी बैठकमा सम्बोधन गर्दै अध्यक्ष नेपालले काम, गतिविधि र व्यवहारबाट पार्टी सञ्चालन गरेर देखाउनुपर्ने बताए।
‘हाम्रो पार्टी सानो छ भन्ने निराशावादी सोचबाट मुक्त भएर, अनि यो पार्टी चल्छ भन्ने खालका निराशावादी कुरा गर्नेहरूलाई मुखभरिको जबाफ दिएर काम, गतिविधि र व्यवहारबाट चलेर देखाउँछौं, विगतमा पनि चलेर देखाएका थियौं, क्रान्ति र आन्दोलन गर्न सक्दैनन् भनेर पार्टीभित्रै पनि निराशावादी कुरा गर्नेहरू थिए, तिनीहरूलाई चोटिलो प्रहार गरेर नयाँ युगको सुरूवात गरेका थियौं, त्यसैले हामी सक्छौं,’ अध्यक्ष नेपालले भने।
उनले जनताको न्यायपूर्ण मागका पक्षमा उभिन पनि आह्वान गरेका छन्।
अध्यक्ष नेपालले आफ्नो ठाउँमा संगठनात्मक कार्ययोजना बनाएर काम गर्न र सर्कुलर नपर्खन पनि केन्द्रीय सदस्यहरूलाई आग्रह गरेका छन्।
