नेपाली कांग्रेसका नेता डा. शेखर कोइरालाले राष्ट्रिय स्वतन्त्र पार्टीका सभापति रवि लामिछानेले सहकारीको रकम ठगी गरेको दाबी गर्दै सजाय पाउनुपर्ने बताएका छन्।
शनिबार काठमाडौंमा प्रजातन्त्र सेनानी संघका प्रतिनिधिहरुको सम्मानमा आयोजित चियापान समारोहलाई सम्बोधन गर्दै कोइरालाले लामिछानेले सहकारीको रकम ठगेको कुरामा कुनै शंका नरहेकाले सजाय पाउनुपर्ने बताएका हुन्।
तर सभापति लामिछानेमाथि भएको मानव अधिकार उल्लंघनबारे सरकार पन्छिन नमिल्ने बताए।
'ठगेको छ उसले । उसले सजाय पाउनुपर्छ । तर त्यसको पनि एउटा प्रक्रिया हुन्छ नि राति उठाएर लगिदिने पोखरा । र पुलिसले, गृह मन्त्रालयले यो भन्नेकी हामी प्रोटेक्शन लिन सक्दैनौं। किन लगेको थियो त ? प्रोटेक्शन दिन सक्दैन भने चितवनमा?,' उनले भने।
उनले कांग्रेस कमजोर भएकाले अधिवेशन समयमै गर्न पनि नेतृत्व तहलाई दबाब दिनुपर्ने बताए।
'तपाईंहरुले साथीहरुलाई भेट्दा कुरा गर्दा अधिवेशन समयमा गर भनेर प्रेसर दिनुपर्यो। सामाजिक सञ्जालमा पनि लेख्न थाल्नुपर्यो,' उनले भने।
त्यस्तै अहिले सरकार नै एमालेकरण भइरहेको जस्तो देखिएको पनि कोइराराले बताए।
'मलाई चिन्ता मलाई कहाँ लागेको छ । राज्य नै एमालेकरण भइरहेको छ की भन्ने देखिरहेको छु । सरकार नै एमालेकरण भइरहेको छ की भन्ने हो । त्यसलाई हामीले कसरी व्यवस्थापन गर्ने भन्नेतिर सोच्नुपर्छ । मन्त्रीज्युहरुले सहकार्य गर्ने हो त्यसमा कुनै शंका नै भएन । तपाईं हामीले खबरदारी गरिरहनुपर्छ । र मात्रै हाम्रा मन्त्रीहरु सचेत हुनुहुन्छ र एमाले पनि सचेत हुन्छ,’ उनले भने। (न्युज एजेन्सी नेपाल)
