राजसंस्था पुनर्स्थापनाका लागि गठन भएको 'संयुक्त जनआन्दोलन समिति' ले तोकेका 'जनकमाण्डर' समेत रहेका मेडिकल व्यवसायी दुर्गा प्रसाईंलाई नेपाल प्रहरीले नियन्त्रणमा लिएको छ।
झापाको काकडभिट्टाबाट प्रहरीले प्रसाईंलाई शुक्रबार बिहान नियन्त्रणमा लिएको हो।
प्रसाईंलाई काकडभिट्टाबाट नेपाल प्रहरीले नियन्त्रणमा लिएको र फ्लाइटमार्फत् आजै काठमाडौं ल्याउने तयारी भइरहेको प्रसाईंलाई पक्राउ गर्न खटिएकामध्ये एक प्रहरी अधिकृतले सेतोपाटीसँग भने।
प्रसाईंलाई मेची पुलबाट कालो सिसा भएको निजी गाडीमा राखेर प्रहरीले भद्रपुर लगेको छ। नेपाल प्रहरीको केन्द्रीय अनुसन्धान ब्युरो (सिआइबी) को टोलीले प्रसाईंलाई नियन्त्रणमा लिएको हो।
नेपाल प्रहरीका केन्द्रीय प्रवक्ता दिनेश आचार्यले प्रसाईं नियन्त्रणमा परेको विषयमा केहीबेरमा प्रेस विज्ञप्ति जारी गर्ने बताएका छन्।
प्रसाईंलाई भारतस्थित असामबाट काकडभिट्टा ल्याएर नेपाल प्रहरीले नियन्त्रणमा लिएको हो।
राजसंस्था पुनर्स्थापना गर्न भन्दै चैत १५ गते तीनकुने क्षेत्रमा प्रदर्शन भएको थियो। प्रदर्शनकारीले सुरक्षा घेरा तोडेपछि धकेलाधकेल भएको थियो।
प्रसाईंले गाडी हुइँक्याउँदै सुरक्षा घेरा तोडेका थिए। प्रहरीले अश्रुग्यास, पानीका फोहरा र गोलीसमेत चलाएको थियो। तीनकुने घटनामा दुई जनाको मृत्यु भएको थियो भने २० जना घाइते भएका थिए।
चैत १५ गते अपराह्नदेखि प्रसाईं फरार थिए।
उनले यसबीचमा दुई वटा भिडिओ सन्देश जारी गर्दै आफू नेपालमै रहेको दाबी गरेका थिए।
