नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले वर्तमान सरकारविरूद्ध एमालेभित्रै धुँवा पुत्ताउन थालेको बताएका छन्।
प्रेस सेन्टर रुपन्देहीले बिहीवार भैरहवामा गरेको पत्रकार सम्मेलनमा पूर्व प्रधानमन्त्री प्रचण्डले सत्तारूढ दलभित्रै असन्तुष्टि चुलिएको आधारले सरकार धेरै अगाडि नजाने भनेको बताएका हुन्।
प्रचण्डले नयाँ वर्षभित्र नयाँ सरकार बन्ने दाबी कांग्रेस र एमाले नेताहरूसँगको कुराकानीपछि गरेको बताए।
'सरकार बिरुद्ध एमालेमा धुवा पुत्ताएको छ भने कांग्रेसमा आगो बलेको छ। यो सरकार मैले नयाँ वर्ष २०८२ सम्म रहने आधार छैन र रहँदैन भनेर राजनीतिक विश्लेषणका आधारमा भनेको हो’, प्रचण्डले भने, ‘नेपाली कांग्रेस र एमालेका कैयौँ नेतासँग भएका संवादका आधारमा पनि सरकार जाने स्थिति छैन भनेको हो।’
अध्यक्ष प्रचण्डले आफ्नो टिप्पणीलाई एमालेले सरकारमा नहुँदाको कुण्ठा भनेकोप्रति आपत्ति जनाए। उनले सरकारमा नहुँदा आफूलाई कुनै कुण्ठा नभएको बताए।
अध्यक्ष प्रचण्डले सरकार जति टिक्छ उत्ति जनताबाट आलोचित हुँदै जाने पनि दाबी गरे। यद्यपि माओवादी केन्द्रलाई अहिले सरकारमा जाने रूची नभएको उनले बताए।
