सम्पत्ति शुद्धीकरण मुद्दामा इच्छाराज तामाङलाई थुनामा राख्न दिएको आदेशलाई सर्वोच्च अदालतले सदर गरेको छ।
न्यायाधीशहरू नहकुल सुवेदी र अब्दुल अजीज मुसलमानको इजलासले दुई वटा मुद्दामा ‘कानुन बमोजिम’ गर्न आदेश गरेको सूचना अधिकारी निराजन पाण्डेले जानकारी दिए। उक्त आदेश सर्वोच्चको शुक्रबारको इजलासले गरेको हो।
‘कानुन बमोजिम गर्नू भनेको पहिले जे आदेश भएको छ। त्यसअनुसार अघि बढ्नु भनेर आदेश भएको हो,’ पाण्डेले भने।
तामाङले सर्वोच्च अदालतमा २०८० माघ २५ गते दुई वटा मुद्दामा निवेदन दिएका थिए।
ठगी सम्बन्धी कसुर तथा संगठित अपराध सम्बन्धी कसुरमा जिल्ला अदालत काठमाडौंबाट पुर्पक्षको लागि थुनामा राख्ने आदेश भई उच्च अदालत पाटनले सदर गरेको विषयमा बेरितको आदेश बदर गर्न माग गरेका थिए।
त्यसमा सर्वोच्च अदालतले बेरितको आदेश परिवर्तन गरिरहन नपर्ने भन्दै कानुन बमोजिम गर्न आदेश दिएको हो।
‘काठमाडौं जिल्ला अदालतको २०७८ पुस १४ मा भएको आदेश र सो आदेशलाई सदर गर्ने गरी उच्च अदालत पाटनबाट २०७९ कात्तिक २५ मा भएको आदेश बेरितको नदेखिँदा परिवर्तन गरिरहन परेन,’ उक्त आदेशमा भनिएको छ।
त्यस्तै अर्को निवेदनमा पनि सर्वोच्चले कानुन बमोजिम गर्न आदेश दिएको हो। अर्को सम्पत्ति शुद्धीकरण सम्बन्धी मुद्दामा पनि बेरितको आदेश बदर गरी तारेखमा बसी मुद्दा लड्न पाऊ भन्दै गरेको निवेदनमा सर्वोच्चले केही गर्न नपरेको आदेश गरेको हो।
‘प्रस्तुत निवेदनसँग सम्बन्धित सम्पत्ति शुद्धीकरणको मुद्दा मिति २०८० माघ २१ मा फैसला भइसकेकोले प्रस्तुत निवेदनमा केही गरिरहनु परेन। कानुन बमोजिम गर्नू,’ आदेशमा भनिएको छ।
विशेष अदालतले सिभिल सेभिङ एण्ड क्रेडिट कोओपोरेटिभ लिमिटेडका सञ्चालक तामाङलाई दोषी ठहर गरी एक अर्ब ७२ करोड ४४ लाख ५९ हजार ९७ रुपैयाँ बराबरको जरिवाना गरेको थियो।
त्यस्तै तीन वर्ष कैद सजाय समेत सुनाएको थियो।
विशेष अदालतका न्यायाधीशहरू अध्यक्ष टेकनारायण कुँवर, सदस्य तेजनारायण सिंह राई र सदस्य मुरारीबाबु श्रेष्ठको इजलासले २०८० माघ ७ गते तामाङलाई दोषी ठहर गरेको थियो। सोही इजलासले माघ २१ गते सजाय निर्धारण गरेको थियो।
उनीसँगै विशेष अदालतले सिर्जना शाक्य तामाङलाई पनि बिगो रकम एक अर्ब तीन करोड ५४ लाख ४३ हजार ४८७ रुपैयाँ बराबरको जरिवाना र एक वर्ष ६ महिना कैद ठहर गरेको थियो।
प्रतिवादी केशवलाल श्रेष्ठको हकमा २५ करोड ६५ लाख ८६ हजारु १२४ रूपैयाँ जरिवाना र एक वर्ष ६ महिना कैद हुने ठहर भएको थियो। इच्छाराज, सिर्जना, केशवलाल, मिना श्रेष्ठ, प्रतीक्षा तामाङ र प्रतिष्ठा तामाङको नाममा रहेको सम्पत्ति जफत गर्ने फैसला भएको थियो।
*समाचार सम्पादन गरिएको
