अख्तियार दुरूपयोग अनुसन्धान आयोगले मधेस प्रदेश सभा सदस्य सरोजकुमार सिंहका स्वकीय सचिवलाई पक्राउ गरेको छ।
सांसद सरोजकुमार सिंहका स्वकीय सचिव ६५ वर्षीय विनोदकुमार लाल कायस्थलाई पक्राउ गरेको सहायक प्रवक्ता देवीप्रसाद थपलियाले बताए।
प्रदेश सांसद सिंह समेतले विभिन्न उपभोक्ता समितिहरू गठन गरेर समितिको खातामा दाखिला भएको रकम आफ्नो निजी सचिव कायस्थमार्फत झिक्न लगाउने गरेको आरोप छ। सांसद सिंहले आफ्नो र श्रीमतीको खातामा बैंकमा रकम जम्मा गर्न लगाएर भ्रष्टाचार गरेको आरोप लागेको हो।
उक्त सूचना पछि काठमाडौंबाट खटिएको अख्तियारको टोलीले जनकपुर उपमहानगरपालिका-९ सरस्वती टोल बस्ने कायस्थलाई सोमबार नियन्त्रणमा लिएको हो।
अख्तियारले मधेस प्रदेश सांसद सिंहले प्रयोग गरिरहेको मोबाइल फोन पनि नियन्त्रणमा लिएर अनुसन्धान गरिरहेको छ।
सिंह जनता समाजवादी पार्टी नेपालका महोत्तरी क्षेत्र नम्बर ४ (ख) का सांसद हुन्।
