प्रतिनिधि सभाको बैठकअघि सभामुख देवराज घिमिरेले सत्ता र प्रतिपक्षी दलका प्रमुख सचेतकहरूसँग छलफल गरे पनि सदनको गतिरोध अन्त्य गर्नेबारे सहमति जुट्न सकेको छैन।
सभामुख घिमिरेले बुधबार दिउँसो प्रमुख सत्ता र प्रतिपक्षी दलका सचेतकहरूसँग छलफल गरेका थिए।
सभामुखको सचिवालयका अनुसार प्रमुख सचेतकहरूले आ-आफ्नो अडान कायमै राखेका छन्।
प्रतिनिधि सभा बैठक बुधबार दिउँसो १ बजेका लागि बोलाइए पनि उक्त समयमा बैठक बस्न सकेन।
मंगलबार पनि प्रतिनिधि सभा बैठक बस्न सकेको थिएन।
भिजिट भिसा प्रकरणमा प्रतिपक्षी दलहरूले गृहमन्त्री रमेश लेखकको राजीनामा माग गर्दै आएका छन् भने कांग्रेस र एमालेले भने गृहमन्त्रीले सदनमा बोल्न पाउनुपर्ने बताइरहेका छन्।
प्रतिपक्षी दलहरूले २०६४ देखि अहिलेसम्मका गृहमन्त्रीका कार्यकालमा भएका भिजिट भिसाका विषयबारे छानबिन गर्न समिति गठन गर्नुपर्ने, गृहमन्त्री रमेश लेखकले छानबिन अवधिभर राजीनामा दिनुपर्ने र यसबारे प्रधानमन्त्री केपी शर्मा ओलीले सदनमा जबाफ दिनुपर्ने निष्कर्ष निकाल्दै त्यसअनुसार सभामुखसँगको छलफलमा प्रस्तुत हुने गरेका छन्।
तर गृहमन्त्री लेखकले भने आफू भिजिट भिसा प्रकरणमा संलग्न नरहेको दाबी गर्दै आएका छन् भने यस विषयमा आफूले सदनमा बोल्न पाउनुपर्ने बताइरहेका छन्।
