पूर्वराष्ट्रपति विद्यादेवी भण्डारीले काठमाडौंको थापागाउँमा आज सम्पर्क कार्यालय सञ्चालनमा ल्याउँदैछिन्।
काठमाडौं महानगरका पूर्वउपमेयर विदुर मैनालीको घर भाडामा लिएर भण्डारीले मदन भण्डारी हीरक जन्मोत्सव मूल व्यवस्थापन समितिको कार्यालय प्रयोजनका लागि भन्दै सचिवालय खोल्न लागेकी हुन्।
उनले त्यही घरबाट राजनीतिक गतिविधि गर्ने उनीनिकट एमालेका नेताहरू बताउँछन्।
भण्डारीलाई एमाले केन्द्रीय कमिटीले राजनीतिमा आउन रोक्ने निर्णय गरे पनि भण्डारी एमाले पूर्वउपाध्यक्षको हैसियतमा राजनीतिक गतिविधिमा व्यस्त छिन्।
थापागाउँमा रहेको सचिवालय उद्घाटन बिहीबार गर्ने कार्यक्रम छ। उक्त कार्यक्रममा भण्डारीका साथै एमाले वरिष्ठ उपाध्यक्ष ईश्वर पोखरेल पनि सहभागी हुनेछन्।
‘कार्यक्रममा पूर्वउपाध्यक्ष भण्डारी र वरिष्ठ उपाध्यक्ष पोखरेल बोल्ने कार्यक्रम तय भएको छ,’ स्थायी कमिटी सदस्य कर्ण थापाले सेतोपाटीसँग भने।
गत असार १४ गते मदन भण्डारीको ७४ औं जन्मजयन्तीका दिन पनि पोखरेलले बोलेका थिए। सोही दिन भण्डारी एमालेको सक्रिय राजनीतिमा फर्केको घोषणा गरेकी थिइन्। उनले आफ्नो सदस्यता नवीकरण भएको बताएकी थिइन्। तर एमाले केन्द्रीय कमिटी बैठकले उनलाई राजनीतिमा फर्कन रोक लगाएसँगै सदस्यता स्वत: नवीकरण नभएको बताउने गरेको छ।
-1742801159.jpg)
-1746009348.jpg)
