इच्छाकामना साहित्य प्रवाहले नयाँ वर्ष २०८१ को अवसर पारेर काव्य यात्रा सुरु गरेको छ।
भाषा, कला, साहित्य, संगीतको संरक्षण र संवद्र्धन गर्ने उद्देश्यले इच्छाकामना गाउँपालिकामा स्थापना भएको यो संस्थाले जिल्लाको सबैभन्दा उचाईमा रहेको पहाड सिराइचुलीबाट काव्य यात्रा प्रारम्भ गरेको हो।
१९४५ मिटर उचाईमा रहेको सिराइचुलीको पर्यटन प्रबर्द्धन पनि गर्ने उद्देश्यले यहाँबाट काव्य यात्रा सुरु गरेको इच्छाकामना साहित्य प्रवाहका अध्यक्ष एकराज पोखरेलले जानकारी दिए।
इच्छाकामनाको वडा नम्बर १ मा पर्ने सिराइचुली पुग्न पृथ्वी राजमार्गबाट करिब एक घण्टा गाडीमा र त्यसपछि एक घण्टा लालीगुराँसले ढकमक भएको जंगलै जंगलको बाटो पैदल यात्रा गर्नुपर्छ। दुर्लभ चरा काँढे भ्याकुर पनि पाइने यो क्षेत्रमा चरामा रुची राख्नेका लागि अझै विशेष छ।
यहाँ नयाँ वर्षको दिन विशेष मेला पनि लाग्छ। इच्छाकामनाको पहाडी क्षेत्रमा चेपाङ समुदायको बाहुल्यता छ।
अध्यक्ष पोखरेलले जिल्लाकै शिरमा रहेको पर्यटकीय महत्वको गन्तव्यको प्रचार गर्ने र नेपाली साहित्य, कला र संस्कृतिको जर्गेना गर्न सघाउने उद्देश्य राखेर यहाँबाट काव्य यात्रा सुरु गरेको बताए।
कार्यक्रममा कविहरु भूपिन व्याकुल, अनिल श्रेष्ठ, कृष्णप्रसाद पोखरेल, तेजविलास अधिकारी, रामनाथ त्रिपाठी, शिव पौडल, टंक त्रिपाठी, दिनेश अधिकारी, माधव गिरीलगायतले कविता तथा गजल वाचन गरेका थिए।
संस्थाका सल्लाहकार संयोजक तेजविलाश अधिकारीले सिराइचुलीबाट सुरु भएको काव्य यात्रालाई गाउँपालिकाका सबै वडाहरुमा पुर्याउने बताए। इच्छाकामना गाउँपालिकामा इच्छाकामना मन्दिर, राजापृथ्वीनारायण शाहका नाती शत्रुभञ्जन शाहले बनाएको उपरदाङगढी, लामो झरना, अन्नपूर्ण बालगौरी पाथीभारा मन्दिर, त्रिशूली नदी, विभिन्न गुफाहरु छन्। अधिकारीले धार्मिक, पर्यटकीय, साँस्कृतिकरुपमा महत्व भएका स्थानहरुमा पुगेर कला, साहित्य र संस्कृतिको प्रवद्र्धन गरिने बताए।
यो संस्थाले ‘इच्छा दर्पण’ नामको स्मारिका प्रकाशन गर्छ। साथै गाउँपालिका क्षेत्रमा साहित्यको विकासमा युवाहरुलाई प्रोत्साहन गर्ने काम पनि गर्दै आएको संरक्षक कृष्णप्रसाद पोखरेलले बताए। २०७३ सालको असारमा स्थापना भएको यस संस्थाले ७ लाख ५० हजार रुपैयाँको अक्षय कोष खडा गरेको छ। यो कोषको आम्दानीले साहित्य क्षेत्रमा लाग्दै गरेका व्यक्तिलाई प्रोत्साहन गर्ने र पुरस्कार प्रदान गर्ने गरिएको कोषाध्यक्ष रोहिणीप्रसाद त्रिपाठीले बताए।
काव्य यात्राको क्रममा इच्छाकामना गाउँपालिकाको विकट क्षेत्रमा रहेका हात्तीवाङ मावि, जनप्रिय मावि र आधारभूत विद्यालय भाराङलाई साहित्यिक पुस्तकहरु प्रदान गरिएको थियो।
कवि भूपिनले गाउँ–गाउँमा साहित्य, कला, संस्कृति प्रतिको चेतको विकास गर्न काव्य यात्राले सघाउने विश्वास व्यक्त गरे। अर्का कवि अनिल श्रेष्ठले समाजमा रहेका विक्रीति, विसंगती हटाउन, राम्रा कुराहरुको प्रवद्र्धनमा सघाउने भएकाले साहित्यको विकासको विशेष महत्व रहेको बताए।