बर्दिया प्रहरीले मान्छे नबस्ने घरबाट ६५९ बट्टा इन्जिन आयल बरामद गरेको छ।
भन्सार छलेर ल्याई लुकाएर राखिएको अवस्थामा प्रहरीले बढैयाताल गाउँपालिका-८ स्याउली बजारमा रहेको बसन्तसिंह ठकुरीको घरबाट सो परिमाणको इन्जिन आयल बरामद गरेको हो।
जिल्ला प्रहरी कार्यालय बर्दियाका प्रवक्ता डिएसपी तुल्सीराम अर्यालका अनुसार सर्भो एक लिटरको ४६५ बट्टा र बजाज डिटिएस लेखेको १९४ बट्टा गरी ६४९ बट्टा इन्जिन आयल बरामद गरिएको जनाएको छ।
प्रहरीले गोप्य सूचनाका आधारमा उक्त घरमा छापा हानेको थियो। त्यसक्रममा इन्जिन आयल बरामद भएको डिएसपी अर्यालले जानकारी दिए।
बरामद गरिएको इन्जिन आयल प्रहरीले भन्सार कार्यालयलाई बुझाइसकेको छ।
