राष्ट्रिय प्रजातन्त्र पार्टी (राप्रपा) ले काठमाडौंको माइतीघर मण्डलमा गरेको प्रदर्शनको क्रममा समातिएका अमेरिकी नागरिकलाई गृह मन्त्रालयले डिपोर्ट गर्ने निर्णय गरेको छ।
नेपाल विद्युत प्राधिकरणबाट कुलमान घिसिङलाई बर्खास्त गर्ने सरकारको निर्णयविरूद्ध चैत १४ गते राप्रपाले माइतीघरमा प्रदर्शन गरेको थियो।
उक्त प्रदर्शनमा सहभागी भएका अमेरिकी नागरिक ५८ वर्षीय जुलियन क्रिपा ब्लिसलाई प्रहरीले नियन्त्रणमा लिएको थियो।
प्रहरीले उनीमाथि थप अनुसन्धानको लागि अध्यागमन विभागमा पठाएको थियो।
अध्यागमन विभागले उनीमाथि अनुसन्धान गरेर अहिले डिपोर्ट गर्ने प्रक्रियामा अघि बढेको निर्देशक तथा सूचना अधिकारी टीकाराम ढकालले जानकारी दिए।
‘अनुसन्धान गरेर गृह मन्त्रालयमा पठाएका थियौं। हिजो गृहबाट पनि जबाफ आएपछि अब प्रक्रिया अघि बढेको छ,’ ढकालले भने।
उनका अनुसार ब्लिसलाई अब दुई वर्ष नेपाल आउन प्रतिबन्ध गरिएको छ।
उनले अनुसन्धान अधिकारीसँगको बयानमा आफू राजनीतिक कार्यक्रममा सहभागी हुने उद्देश्यले त्यहाँ नपुगेको पनि बयान दिएका छन्।
बयानमा उनले आफू गाई, महिला तथा बालबालिका जोगाउनुपर्ने भन्दै अभियान गर्दै आएको बताएका छन्।
‘उहाँले आफू गाईको रक्षा गर्नुपर्ने, महिला तथा बालबालिका जोगाउनुपर्ने भन्ने विषयमा वकालत गर्दै आएको भनेर भन्नुभएको छ,’ ढकालले भने, ‘त्यसदिन पनि मेरो उद्देश्य कुनै प्रदर्शनमा सहभागी हुने थिएन। कसैले आएर मलाई प्लाकार्ड थमाएपछि त्यहाँ पुगेको हुँ भन्नुभएको हो।’
गत जनवरी १८ मा आएका उनको सुरूमा १५ दिनको भिसा प्राप्त भएको देखिन्छ। फेब्रुअरी ३ मा उनको भिसा अवधि सकिएको थियो। उनले पुन: फेब्रुअरी १९ देखि मार्च २४ सम्म ३४ दिनको भिसा अवधि थप गरेको फेला परेको थियो।
यो पनि: कुलमानको समर्थनमा राप्रपाले गरेको प्रदर्शनमा सहभागी विदेशी नागरिक को हुन्?
-1743061812.jpg)
