अख्तियार दुरूपयोग अनुसन्धान आयोगले नेपाल आयल निगमका डिपो प्रमुखसहित पाँच जनाविरूद्ध भ्रष्टाचार मुद्दा दर्ता गरेको छ।
आइतबार अख्तियारले नेपाल आयल निगम, प्रादेशिक कार्यालय गगनगौडाका डिपो प्रमुख चितरंजन दाससहित पाँच जनाविरूद्ध विशेष अदालतमा भ्रष्टाचार मुद्दा दायर गरेको हो।
उनीहरमाथि बिलमा उल्लेख भएभन्दा बढी डिजेल लोड गरेको अख्तियारको ठहर छ।
अख्तियारले प्रमुख दाससँगै पश्चिमाञ्चल ट्रेडर्स तथा कम्पनीका सञ्चालक बाबुराम जमरकट्टेल, धौलागिरी पेट्रोलियम एसोसिएसनका तत्कालीन प्रतिनिधि जगन्नाथ ढुंगाना र लक्ष्मण रानाभाट र ट्यांकर नम्बर ग २ ख ८३६ नम्बरका चालक निर्मल थापाविरूद्ध मुद्दा दायर भएको हो।
उनीहरूविरूद्ध चार लाख ४८ हजार ४२५ रुपैयाँ बिगो कायम गरी सजायको मागदाबी गरेको छ।
डिपो प्रमुखसमेतको मिलेमतोमा बिलमा उल्लेख भएको भन्दा बढी परिमाणमा डिजेल सप्लाइ गरेको भन्ने उजुरी परेको थियो।
उनीहरूले टैंकट्रकमा १२ हजार लिटर डिजेल स्वीकृत गरिएको थियो। पश्चिमाञ्चल ट्रेडर्सले निगमको खातामा आइपिएस गरेर पैसा जम्मा गरेको थियो।
बिल भौचर तयार भइ पेट्रोलियम पदार्थ लिन पठाएकोमा डिप र शिल गर्ने जिम्मेवारीमा रहेका डिलर्स एशोसिएशनको प्रतिनिधि ढुंगाना र राचनाभाटसँग मिलेर २०८० साउन २५ गते सिसी क्यामरा नै बन्द गरेर ग २ ख ८३६ नम्बरको टैंकट्रकमा डिजेल लोड गरिएको थियो।
१२ हजार लिटर लोड गर्नुपर्नेमान १५ हजार ३८ लिटर लोड गरी शिल लगाएर पठाइएको थियो।
पोखरा महानगरपालिका-२७ डाँडाको नाकामा नियन्त्रणमा लिएर जाँच गर्दा १५ हजार ३८ लिटर देखिएको थियो।
३ हजार ३८ लिटर डिजेल भ्रष्टाचार गरेको भन्दै त्यसदिन प्रति लिटर १४७ रुपैयाँ अनुसार चार लाख ४८ हजार ५२५ रुपैयाँको हानि भएको देखिएको अख्तियारले जनाएको छ।
