नेपाल प्रहरीले आह्वान गरेको सार्वजनिक खरिद सम्बन्धी बोलपत्रमा मिलेमतो गरेको आरोप लागेपछि छानबिन सुरू भएको छ।
बन्दोबस्तीका सामान खरिदका लागि गरिएको बोलपत्र आह्वानमा मिलेमतो भएको उजुरीपछि सार्वजनिक खरिद अनुगमन कार्यालयले छानबिन थालेको हो।
कार्यालयका सहसचिव तथा प्रवक्ता रामबन्धु सुवेदीका अनुसार खरिद अनुगमन शाखाका प्रमुख विनोद कोइरालाको नेतृत्वमा ६ सदस्यीय समिति गठन गरी छानबिन सुरू गरिएको छ।
उक्त समितिलाई सात दिनभित्र प्रतिवेदन बुझाउन भनिएको छ।
‘के कसो भएको हो, यथार्थ विवरण अध्ययन गर्नू र सिफारिस गर्नू भन्ने कार्यादेश समितिलाई दिइएको छ,’ प्रवक्ता सुवेदीले भने, ‘समितिको निष्कर्ष र सिफारिस केकस्तो आउँछ त्यसअनुसार नै कार्यालयले निर्णय लिन्छ।’
नेपाल प्रहरी प्रधान कार्यालयले बन्दोबस्तीका सामानका लागि साउन १२ गते बोलपत्र आह्वान गरेको थियो।
झुल, म्याट्रेस, ब्लु डांग्री क्लोथ, जुनियर अफिसर्स पी-क्याप, नाइलन वेब बेल्ट, ट्राफिक रेन सुट, स्नो सुइटर, ब्यान्ड ड्रेस सेट, गगल्स, विसल्ट विथ विसल्ट कर्ड, पाल, ट्राफिक ज्याकेट, इन्सिग्निया बेस, स्नो वुलन भेष्ट र ट्राउजर, गर्भवती महिला युनिफर्म, स्नो गगल्स, क्यामियो चुस्ता, ट्राफिक पी-क्याप, स्नोक्याप, स्नो ग्लभ्स र ट्राफिक रिफ्लेक्टर ज्याकेटका लागि बोलपत्र आह्वान गरेको थियो।
सीमित ठेकेदार कम्पनीलाई मात्रै टेण्डर पर्न खोजिएको भन्दै कार्यालयमा उजुरी परेको थियो। यस्तै मिलेमतो गरी भ्रष्टाचारसमेत गर्न लागेको भन्दै अख्तियार दुरूपयोग अनुसन्धान आयोग टंगालमा समेत उजुरी परेको थियो।
यसरी उजुरी प्राप्त गरेपछि अख्तियारले समेत कार्यालयलाई छानिबन गर्न निर्देशन गरेको प्रवक्ता सुवेदीले जानकारी दिए।
‘क्राइटेरिया बनाउँदा केही सीमीत कम्पनीलाई पर्ने गरी बोलपत्र आह्वान गरियो भनेर भनिएको छ। अख्तियारमा उजुरी परेपछि निर्देशन प्राप्त भएको हो,’ उनले भने, ‘खरिदको अनुगमन गर्ने काम कार्यालयको भयो। अख्तियारले भ्रष्टाचार भइसकेपछि अनुसन्धान गर्ने भएकाले निर्देशन प्राप्त भएको हो।’
नेपाल प्रहरीले पछिल्लो समय विभिन्न सामान खरिद गर्नका लागि बोलपत्र आह्वान गर्दै आएको छ।
साउन १६ गते, साउन १२ गते, साउन ७ गते, साउन ५ गते बोलपत्र आह्वान गरेको छ।
त्यस्तै नेपाल प्रहरीले अहिले हतियार समेत खरिद गर्ने तयारी गरिरहेको छ। त्यसका लागि बोलपत्र भने आह्वान भइसकेको छैन।
-1746009348.jpg)
