प्रधानमन्त्री कप एकदिवसीय राष्ट्रिय क्रिकेट प्रतियोगितामा कर्णाली प्रदेशले तेस्रो जित निकालेको छ।
मंगलबार मुलपानी मैदानमा कोशी प्रदेशलाई ६ विकेटले पराजित गर्दै कर्णालीले तेस्रो जित हात पारेको हो। कोशी भने लगातार सातौं खेलमा पराजित भइसकेको छ।
कोशीले दिएको १५२ रनको लक्ष्य कर्णालीले ४ विकेटको क्षतिमा २८.३ ओभरमा पूरा गर्यो। कर्णालीका लागि अर्जुन घर्तीले नटआउट ५० रन जोडे। उनले ४८ बलमा ६ चौका र २ छक्का प्रहार गरे।
बलिङमा कोशीका हेमन्त राईले ३ विकेट लिन सफल भए।
त्यसअघिट टस जितेको कर्णालीले फिल्डिङ रोजेपछि पहिले ब्याटिङ गरेको कोशी ३४.३ ओभरमा १५१ रनमै अलआउट भयो।
कोशीका लागि सुजन थपलियाले ७३ रन जोड्दा अरु ब्याटरले उल्लेख रन जोड्न सकेनन्।
बलिङमा कर्णालीका दिनेश अधिकारीले ४ विकेट लिँदा प्रकाश जैसीले ३ विकेट र दिवान पुनले २ विकेट लिन सफल भए।
