नेपाल र क्यानडाबीचको तीन खेलको एकदिवसीय सिरिजको पहिलो खेलमा नेपालले क्यानडाको चौथो विकेट लिएको छ।
नेपालले दिएको २२५ रनको लक्ष्य पछ्याएर ब्याटिङ गरिरहेको क्यानडाका हर्ष थाकेरलाई ३२ रनमा कुशल मल्लले बोल्ड गरेका छन्।
त्यतिबेला क्यानडाले ३३ ओभरमा ४ विकेटको क्षतिमा १७४ रन जोडेको थियो। हर्षले निकोलास किर्टनसँग ६० रनको साझेदारी गरे।
क्यानडाका पर्गत सिंहलाई नेपालका कप्तान रोहित पौडेलले आउट गरेका छन्। उनले ५० रन जोड्नुअघि तेस्रो विकेटका लागि निकोलास किर्टनसँग ७९ रनको साझेदारी गरेका थिए।
त्यसअघि ओपनरद्वय आरोन जोनसन २० रन र नवनीत धलिवाल ६ रनमा आउट भए।
रिजनले धलिवाललाई विकेट पछाडि आसिफ शेखबाट क्याच गराए। रिजनले डेब्यू खेलमै विकेट लिए।
बायाँ हाते तीव्र गतिका बलर रिजनले आफ्नो स्पेलको पाँचौ बलमा विकेट लिन सफल भए। यस्तै सोमपालले जोनसनलाई एलबिडब्लूको धरापमा पारे।
नेपाल २२४ रनमा अलआउट
बिहीबार कीर्तिपुरस्थित त्रिवि मैदानमा टस जितेर पहिले ब्याटिङ गरेको नेपालले ओपनर कुशल भुर्तेलको अर्धशतकमा ५० ओभरमा सबै विकेट गुमाउँदा २२४ रन जोड्यो।
एकदिवसीय खेलमा सातौं अर्धशतक प्रहार गरेका कुशलले ५८ बलमा ९ चौका र १ छक्का प्रहार गर्दै ६२ रन जोडे।
कुशलका ओपनिङ पार्टनर आसिफ शेख ८ रनमै आउट भए भने कप्तान रोहितकुमार पौडेलले पनि ८ रनभन्दा बढी जोड्न सकेनन्। यस्तै भीम सार्की १७ रन र कुशल मल्लले पनि २० बनाए।
आरिफ शेखले ३८ रन जोड्दा नेपालको स्कोर बढेको थियो। आरिफले ५० बलमा ४ चौका प्रहार गरे। पवन सर्राफ पनि १५ रन जोड्दा क्यानडाका शाहिद अहमजाइको एलबिडब्लूको धरापमा परे।
सोमपाल कामीले जोडेको २७ रन नेपालका लागि महत्वपूर्ण सावित भयो। ४९ ओभरको पाँचौं बलमा आउट हुनुअघि उनले २३ बलमा १ चौका र २ छक्का प्रहार गरे। रिजन ढकाल अन्तिम ओभरमा ४ रनमा आउट भए भने सूर्य तामाङ १० रनमा नटआउट रहे। रिजन र सूर्यले नेपाली टिमबाट एकदिवसीय खेलमा डेब्यू गरेका हुन्।
बलिङमा क्याडनाका उदय भगवानले ३ विकेट लिए। उनले ८ ओभरमा १ मेडन राख्दा ४० रन खर्चिए। इश्वर सोधी र साद विन जाफरले २-२ विकेट लिन सफल भए।
नेपालले फागुन पहिलो साता आइसिसी विश्वकप लिग-२ अन्तर्गत नामिबिया र नेदरल्यान्ड्सविरुद्धको सिरिज खेल्नुअघि क्यानडासँग तीन खेलको एकदिवसीय सिरिज खेलेको हो।
