त्रिकोणात्मक टी-२० आई सिरिज अन्तर्गत भोलि हुने खेल दर्शकले निःशुल्क हेर्न पाउने भएका छन्।
नेपाल क्रिकेट संघले सामाजिक सञ्जालमार्फत भोलि हुने खेल हेर्न त्रिवि मैदान आउने दर्शकले टिकट काट्न नपर्ने जानकारी दिएको हो।
सिरिजको यसअघिका सबै खेल प्रत्यक्ष हेर्न दर्शकहरूले टिकट लिनुपर्ने व्यवस्था थियो। तर भोलिको खेलमा हेर्न भने त्रिवि मैदानमा दर्शकहरूले निःशुल्क प्रवेश पाउने क्यानले जनाएको छ।
नेदरल्याण्ड्स र नामिबियाबीचको खेल भोलि बिहान साढे ११ बजेबाट सुरू हुनेछ।
उक्त खेलबाट सिरिजको फाइनलिस्ट तय हुनेछ।
नेपाल भने आजको खेल जितेसँगै फाइनल पुगिसकेको छ।
चारमध्ये २ खेल जितेको नेपाल अंक तालिकाको दोस्रो स्थानमा रहँदै सिरिजको फाइनलमा पुगेको हो। नेपाल र नेदरल्याण्ड्सको समान ४/४ अंक छ।
तेस्रो स्थानमा रहेको नामिबिया र पहिलो स्थानमा रहेको नेदरल्याण्ड्सबीचको खेलबाट जित्ने टिमले मंगलबार नेपालसँग फाइनल खेल्नेछ।
