दक्षिण अफ्रिकन क्रिकेटर एबी डि भिलियर्सले नेपाली क्रिकेट टोली राम्रो भएको बताउँदै प्रशंसा गरेका छन्।
भारतीय पत्रकार शुभांकर मिश्रले उनीसँग गरेको कुराकानीको अंश युट्युबमा अपलोड गरेका छन्।
जहाँ मिश्रले नेपालमा डि भिलियर्सका धेरै फ्यान रहेको बताउँदै नेपालबारे सोधेका थिए।
सन् २०२४ को आइसिसी टी-२० विश्वकपमा नेपालले दक्षिण अफ्रिकाविरूद्धको खेल एक रनले गुमाएको थियो। सो खेलमा नेपाल जित नजिक थियो भन्ने प्रश्नको सुरुमा डि भिलियर्सले ‘थिएन’ भन्दै ठट्टा गरे।
तुरून्तै उनले स्पष्ट पारे, ‘म ठट्टा गरिरहेको थिएँ। उनीहरू एक अद्भुत टोली हुन्। उनीहरू क्रिकेटमा धेरै अगाडि आइसकेका छन्। धेरै खतरनाक क्रिकेट टोली।’
नेपालको टोली कसरी अझ बलियो बन्न सक्छ भन्नेबारे उनले अघि भने, ‘मेरो विचारमा उनीहरूका लागि मुख्य कुरा अझ बढी एकनासको खेल प्रदर्शन गर्नु हो। त्यसको लागि एक मात्र तरिका अझ बढी क्रिकेट खेल्नु हो।’
साथै उनले नेपाली क्रिकेट तथा खेलाडीलाई एक्सपोजर दिन पनि विश्व क्रिकेटलाई आह्वान गरे।
‘उनीहरूलाई थप अवसरहरू दिनका लागि अरू कोही पनि जिम्मेवार छ। त्यसैले विश्वभरका क्रिकेट आयोजकलाई ठूलो अपिल छ, नेपाल जस्ता खेलाडी र टोलीहरूलाई थप क्रिकेट खेल खेल्ने अवसर दिनुहोस्,’ उनले भने।
गत मंसिरमा भएको पहिलो संस्करणको नेपाल प्रिमियर लिग खेल्नका लागि पत्र आएको कुरा उनले स्विकार गरे। तर आफ्नो व्यस्त तालिकाका कारण नेपालमा लिग खेल्न नभ्याएको उनको भनाइ।
उनले भविष्यमा नेपालमा खेल्ने विषयमा आफू आसावादी रहेको पनि बताए।
-1746009348.jpg)
