महिला राष्ट्रिय लिगको उपाधिबाट नेपाल एपिएफ क्लब अब एक जितमात्र टाढा छ। सोमबार लगातार दशौं खेलमा जित हात पारेपछि एपिएफ उपाधि रक्षा नजिक पुगेको हो।
अब एपिएफले बुधबार विराटनगर महानगरपालिका र लिगको अन्तिम खेलमा फागुन ७ गते त्रिभुवन आर्मी क्लबसँग खेल्न बाँकी छ।
यी मध्ये एक खेलमा जित हात पारे एपिएफको उपाधि पक्का हुनेछ। दोस्रो स्थानको आर्मीले अंक गुमाएको अवस्थामा एपिएफलाई अझ सहज हुनेछ।
एपिएफको उपाधि रक्षा अभियानमा स्ट्राइकर सावित्रा भण्डारी 'साम्बा' को योगदान महत्वपूर्ण रह्यो।
उनले जारी लिगमा ४३ गोल गरिन्। साम्बाले ७ ह्याट्रिक गरिन्। उनी दुई खेलमा गोल गर्न असफल भइन्। चौदण्डीगढी नगरपालिकाविरूद्धको पहिलो लेगमा एक्लै १२ गोल गरेकी थिइन्।
पहिलो चरणमा साम्बाले आर्मीविरूद्ध हात पारेको २-० को जितमा मात्र गोल गर्न सकेकी थिइनन्। यद्यपी उनले आर्मीविरूद्ध एपिएफले गरेका दुबै गोलका लागि पास मिलाएकी थिइन्।
सुरुवाती नौ खेलमा एपिएफले गरेका गोलमा साम्बाको भूमिका कुनै न कुनै रूपमा रह्यो। त्यसैले साम्बा एपिएफको एक महत्वपूर्ण खेलाडी भएको मुख्य प्रशिक्षक भगवती थापा बताउँछिन्।
'साम्बा एपिएफकी महत्वपूर्ण सदस्य हुन्। उनी हुँदा टिममा प्लस प्वाइन्ट हुन्छ,' जारी महिला लिगको एकमात्र महिला प्रशिक्षक थापाले भनिन्,'तर फुटबल टिम गेम भएकाले उनलाई सफल स्ट्राइकर बनाउन मिडफिल्डर र डिफेन्डरको पनि उत्तिकै योगदान छ।'
लिगका नौ खेलमा प्रभावशाली खेल पस्केकी साम्बा सोमबार भएको दशौं खेलमा भने चल्न सकिनन्। त्यसैले नेपाल पुलिस क्लबविरूद्धको खेल एपिएफका लागि जारी लिगकै कठिन खेल बन्न पुग्यो।
पहिलो हाफ गोलरहित बराबरीमा सकिएको खेलमा दोस्रो हाफमा एपिएफले आत्मघाती गोलको सहाराले अग्रता लिएको थियो। केहीबरेपछि पुलिसले बराबरी गोल फर्काउँदा एपिएफ स्तब्ध बनेको थियो।
त्यसपछि साम्बा घाइते हुन पुगिन्। खेलको ६९ मिनेटमा सावित्राको दाहिने घुँडामा चोट लागेको थियो। केहीबेर मैदानमा ढलेकी साम्बा राम्रोसँग हिँड्न सकिनन्। त्यसपछि उनको स्थानमा रविना गोले मैदान छिरेकी थिइन्। उनै रविनाको निर्णायक गोलमा पुलिसमाथि एपिएफले २-१ ले जित निकालेर उपाधि रक्षा अभियानलाई बलियो बनायो।
तर साम्बाको चोटले एपिएफलाई पीडा दिलायो।
सुरुमा साम्बाको चोटको विषयमा स्पष्ट हुन सकेन। साँझतिर उनले लिगका बाँकी खेल गुमाउने पक्का भयो।
अब एपिएफले साम्बाको अनुपस्थितिमा बाँकी दुई खेल खेल्नु पर्नेछ। ती दुबै खेलमा उसले साम्बालाई मिस गर्ने पक्का छ।
'साम्बा टिममा नहुँदा केही फरक त पर्छ। तर उनी नहुँदा पनि टिम जित्न सक्षम छ,' एपिएफकी प्रशिक्षक थापा भन्छिन्।
एपिएफले जारी लिगमा शतप्रतिशत जित निकाल्ने क्रममा अहिलेसम्म ७२ गोल गरेको छ। जसमा साम्बाको नाममा आधाभन्दा बढी ४३ गोल छ।
जारी लिगमा साम्बाले गरेका गोल
पहिलो चरण : चन्द्रपुरविरूद्ध - ३ गोल, विराटनगरविरूद्ध - ४ गोल, आर्मीविरूद्ध - ० (एपिएफले गरेका दुवै गोलका लागि पास), पुलिसविरूद्ध - ३ गोल, वालिङविरूद्ध - २ गोल, चौदण्डीगढी - १२ गोल
दोस्रो चरण : चौदण्डीगढी - ८ गोल, चन्द्रपुरविरूद्ध - ६ गोल, वालिङविरूद्ध - ५ गोल
पुलिसविरूद्ध - ०, विराटनगरविरूद्ध - खेल हुन बाँकी, आर्मीविरूद्ध - खेल हुन बाँकी
नेपालका लागि सर्वाधिक अन्तर्राष्ट्रिय गोल गर्ने साम्बा
'साम्बा' को नाममा नेपालका लागि अन्तर्राष्ट्रिय फुटबलमा सबैभन्दा बढी गोल गर्ने कीर्तिमान छ।
गत वर्ष नेपालमा आयोजना भएको १३औं दक्षिण एसियाली खेलकुदमा उनले सो कीर्तिमान बनाएकी थिइन्।
पोखरा रंशगालामा माल्दिभ्सलाई नेपालले ३-० ले हराउँदा ह्याट्रिक गरेपछि उनी नेपालका लागि सर्वाधिक गोल गर्ने फुटबलर बनिन्। ह्याट्रिकसँगै उनले अन्तर्राष्ट्रिय गोल संख्या ३८ पुर्याएकी थिइन्।
साम्बाले त्यहिँ वर्षको भदौमा किर्गिस्तानमा भएको नाडेज्दा कपमा उज्वेकिस्तानविरूद्ध २ गोल गरेर अन्तर्राष्ट्रिय गोल संख्या ३५ पुर्याएकी थिइन्। जससँग उनले अनु लामाको नाममा रहेको कीर्तिमानसँग बराबरी गरेकी थिइन्।
साम्बाको संघर्ष
महिला फुटबलमा साम्बाले सफल खेलाडीको परिचय बनाए पनि उनको फुटबल यात्रा भने सहज रहेन।
लमजुङको सिम्बाली गाउँमा जन्मिएर हुर्किएकी सावित्राले फुटबल खेल्नका लागि घरमै संघर्ष गर्नुपर्यो। स्कुलका केटासँग फुटबल खेल्दा परिवारको गाली खानुपर्यो। आमाको पिटाइ सहनुपर्यो। बाबाको ‘घरमै बसेर पढ’ भन्ने आदेश पालना गर्नुपर्यो।
परिवारसँग मनमुटावबीच उनले घरको आँगनमै खाली खुट्टा मोजाको बलमा आफ्नो फुटबल सपनालाई जीवन्तता दिइरहिन्।
साम्बाका चार दिदीबहिनी छन्, दुइ दाजुभाइ। बुवाको नोकरीले मात्र परिवार चलाउनै मुस्किल भैरहेको देखेकी उनका लागि फुटबल जर्सी किन्नु सपना थियो।
उनलाई फुटबलको भोकले छाडेन। विद्यालयको टिफिन टाइममा खाजा खाइनन्। फुटबल खेलिन् त्यो पनि केटाहरूसँग।
केटाजस्तो भएर हिँडेको देखेर छिमेकीले कुरा काटे। तर साम्बाले परवाह गरिनन्।
फुटबलमा मात्र होइन जिल्ला स्तरको दौडमा समेत उनले गोल्ड मेडल जितिन्। भलिबलमा सिल्भर मेडल। साम्बाले ल्याएको मेडलले छिमेकीको मुख टालियो।
२०७१ साल सावित्राका लागि टर्निङ प्वाइन्ट बन्यो। लमजुङकै घले गाउँमा आयोजना भएको फुटबल प्रतियोगितामा साम्बाले उत्कृष्ट प्रदर्शन गरिन्। प्रतियोगिताकै सबैभन्दा धेरै ९ गोल गरिन्।
खेल हेर्न राष्ट्रिय रेफ्री शुक्र लामा घलेगाउँ पुगेका थिए। सावित्राको खेल देखेर शुक्रले उनलाई सशस्त्र प्रहरीको फुटबल टोलीमा आबद्ध हुने मौका मिलाइदिए। लामाले सावित्रालाई फोन गरेर सशस्त्र प्रहरी क्लबमा आउन सुझाव दिए।
वैशाखसम्म घलेगाउँको खेलम खेलिरहेकी सावित्रा तीन महिनापछि सशस्त्र प्रहरीको एपिएफ क्लबमा महिला फुटबल खेलाडी बनिन्। सशस्त्रमा राष्ट्रिय टोलीका खेलाडी थिए। उनलाई क्लबमा आफूलाइ प्रमाणित गर्ने चुनौती थपियो।
तर मेहेनती साम्बाले हौसला गुमाइनन्।
एन्फाले राष्ट्रिय टोलीमा छनौटका लागि ४४ खेलाडीलाई क्लोज क्याम्पमा राख्यो। साम्बा ४४ मा समेटिइन्। ‘सीमित’ फुटबलको ज्ञानको सहारामा राष्ट्रिय टोलीमा पर्न उनले संघर्ष गर्नुपर्यो।
सन् २०१४ उनका लागि सुनौलो बिहानी बनेर आयो। त्यही वर्ष उनले पाकिस्तानमा भएको साफ च्याम्पियनसिपमा भुटानविरूद्धको खेलबाट राष्ट्रिय टोलीमा डेब्यु गरिन्। डेब्यु खेलमै गोल पनि ठोकिन्।
त्यसयता उनी राष्ट्रिय फुटबल टोलीमा निरन्तर छिन्- गोल मेसिनका रूपमा।
साम्बालाई आफूले केही पाउने अपेक्षाभन्दा राष्ट्रका लागि केही गर्ने भोकले अझै सताइरहेछ।
साम्बालाई खेलमा विपक्षीले समय कटाउन गरेकी तिकडमले चिढ्याउँछ।
साम्बा ब्वाइज कट हेयर स्टाइल राख्छिन्। कतिपयले उनलाई केटा भन्ठान्छन्।
