दक्षिण अफ्रिका अफ्रिका कप अफ नेसन्सको सेमिफाइनलमा प्रवेश गरेको छ।
गएराति भएको क्वार्टरफाइनल खेलमा केप भर्डेलाई टाइब्रेकरमा हराउँदै दक्षिण अफ्रिका अफ्रिका कप अफ नेशन्सको सेमिफाइनलमा पुगेको हो।
निर्धारित समयमा गोलरहित बराबरी भएपछि खेल पेनाल्टी सुटआउटमा पुगेको थियो।
दक्षिण अफ्रिकालाई विजयी गराउन कप्तान समेत रहेका रोनवेन विलियम्सले केप भर्डेको चार पेनाल्टी रोके।
उनले केप भर्डेका बेबे, विली सेमेडो, लरोस ड्वार्टे र प्याट्रिक एन्ड्राडेको प्रहार रोकेका थिए। केप भर्डेका गोलकिपर भोजिन्हा दक्षिण अफ्रिकाको दुई प्रहार रोके।
दक्षिण अफ्रिकाका जाखेले लेपासाले पेनाल्टी मिस गरेका थिए भने औब्रे मदिबाको प्रहार गोलकिपर भोजिन्हाले रोकेका थिए।
केप भर्डेका ब्र्यान टेइक्सेराले मात्रै गोल गरेका थिए। दक्षिण अफ्रिका पेनाल्टी सुटआउटमा २-१ ले विजयी भएको हो।
सेमिफाइनलमा दक्षिण अफ्रिकाले नाइजेरियासँग खेल्नेछ। यता आइभरी कोस्टले मालीलाई २-१ गोलले हराएर सेमिफाइनलमा स्थान बनाएको छ। सेमिफँइनलमा आइभरी कोस्टले कंगोसँग खेल्नेछ।
