आगामी माघको तेस्रो सातादेखि भारत र श्रीलंकाले संयुक्त रूपमा आइसिसी टी-२० विश्वकप आयोजना गर्दैछन्।
यसपाली नेपालले तेस्रो पटक टी-२० विश्वकप खेल्दैछ। नेपालले समूहमा पूर्व च्याम्पियन वेस्ट इन्डिजसहित इंग्ल्यान्ड, बंगलादेश र पहिलो पटक टी-२० विश्वकप खेल्न लागेको इटालीसँग नेपालले प्रतिस्पर्धा गर्नेछ।
समूहका चारै खेल मुम्बईमा खेल्ने नेपाली टोलीमा पर्न अहिले खेलाडीहरूबीच चर्को प्रतिस्पर्धा छ। जसको मापन गर्ने महत्वपूर्ण प्रतियोगिता सिद्धार्थ बैंक नेपाल प्रिमियर लिग (एनपिएल) अहिले चलिरहेको छ।
खेलकुदकै महान् चाड झैँ उल्लासमय बनिरहेको एनपिएलमा नेपाली राष्ट्रिय टोलीका खेलाडीका प्रदर्शन भने उत्साहजनक बन्न सकिरहेको छैन।
राष्ट्रिय टोलीका कप्तान रोहितकुमार पौडेलले आफूले रन बनाए पनि टोलीलाई (लुम्बिनी लायन्स) जिताउन सकिरहेका छैनन्।
राष्ट्रिय टोलीका ओपनरद्वय आसिफ शेख (जनकपुर बोल्ट्स) र कुशल भुर्तेल (पोखरा एभेन्जर्स) बाट अपेक्षाकृत ब्याटिङ भइरहेको छैन। सुरुवाती दुई खेलमा अर्धशतक बनाएका भुर्तेल पछिल्ला दुई खेलमा त गोल्डेन डक भए।
स्पिनर ललित राजवंशी (जनकपुर बोल्ट्स) यो सिजन विकेट लिन संघर्ष गरिरहेका छन्। सोमपाल कामी (कर्णाली याक्स) महँगो सावित भइरहेका छन्।
तर राष्ट्रिय टोलीका केही खेलाडीको प्रदर्शन भने लोभलाग्दो छ। सन्दीप लामिछानेको (विराटनगर किंग्स) स्पिनको जादू चलेको छ। दीपेन्द्रसिंह ऐरी (सुदूरपश्चिम रोयल्स)ले आफ्नो अलराउन्ड छवि कायम राखेका छन्।
गुलशन झाले पनि आइतबार लोभलाग्दो खेल देखाएका छन्। अलराउन्डर गुलशनले आफ्नो आक्रामक ब्याटिङको छवि एनपिएलमा पनि कायम राखेका छन्।
आइतबार काठमान्डु गोर्खाजसँग कर्णाली याक्स पराजित भए पनि गुलशनले कर्णालीका लागि उत्कृष्ट ब्याटिङ गरेका थिए। टोलीको स्कोर धर्मराएको बेला गुलशनले नटआउट ४९ रन जोड्दा कर्णालीले १४९ रन जोडेको थियो। उनले २२ बलमा ६ चौका र ३ छक्का प्रहार गरेका थिए।
फिनिसरको भूमिकामा रहेका गुलशनले यसअघि दुई खेलमा मात्र ब्याटिङ गर्ने अवसर पाए। जसमा उनले विराटनगरविरूद्ध १० बलमा २० र सुदूरपश्चिमविरूद्ध १३ बलमा १३ रन बनाए।
आइतबारको हारसँगै कर्णाली एनपिएलको लिग चरणबाटै बाहिरिने संघारमा पुगेको छ।
यस्तोमा गुलशन आफ्नो प्रदर्शनबाट भने सन्तुष्ट छैनन्। उनले आफ्नो भूमिकामा सफल भएको भए टोलीले जित्ने विश्वास रहेको बताए। उनले साना-साना कुरामा गल्ती गर्दा कर्णालीले खेल हारिरहेको प्रतिक्रिया दिए।
‘हामी राम्रो क्रिकेट खेलिरहेका छौँ। तर हरेक ओभरमा साना-साना अवसर खेर फालिरहेका छौं। त्यसैले हाम्रो पक्षमा नतिजा आएको छैन,’ आइतबार चौथो खेलमा पराजित भएपछि गुलशनले भने, ‘मैले आफ्नो जिम्मेवारी पूरा गरेको भए त पक्का जितिन्थ्यो त्यस्तो केही भएन।’
कर्णालीले लगातार हारिरहेको बेलामा गुलशनले विश्वकप छनोटमा नेपालले लगातार खेल जितेको कुरा सम्झिए। जहाँ नेपाल अपराजित रहँदै टी-२० विश्वकप छनोट जित्दै भारत र श्रीलंकामा हुने विश्वकपको टिकट पक्का गरेको थियो।
‘ब्याटिङ र बलिङ खराब हुन सक्छ। तर फिल्डिङ एकदमै राम्रो हुनु पर्छ। हामीले विश्वकप छनोटमा हामीले औसत ब्याटिङ र बलिङ गरिरहेका थियौं। तर हामीले प्राय: सबै खेल फिल्डिङका कारण पनि जित्यौं। त्यहीँ फिल्डिङ एनपिएलमा कमी भएको जस्तो लाग्छ। एनपिएलका हरेक खेलमा क्याच छुटिरहेको छ। बाई गइरहेको छ। त्यसमा हामी पछि परिरहेका हौं,’ गुलशनले भने।
पछिल्लो समय ब्याटिङमा उत्कृष्ट क्षमता देखाइरहेका गुलशनले आफूले टोलीका लागि चाहिएको बेलामा छक्का र चौका हान्ने कोसिस गरेको बताए।
पछिल्लो समय खेल्ने शैलीका कारण उनका समर्थक पनि बढेका छन्। यसले प्रदर्शनका लागि कतिको दबाब हुन्छ भन्ने प्रश्नमा गुलशनको उत्तर छ, ‘खेलमा राम्रो खेल्न पर्छ। तर सबै आफ्नो नियन्त्रणमा हुँदैन। तर पनि सधैं उत्कृष्ट दिने कोसिस गर्छु।’
१९ वर्षीय गुलशन चार वर्षअघि राष्ट्रिय टोलीमा परेका थिए। सुरूमा तीव्र गतिको बलरको रूपमा टोलीमा छनोट भएका गुलशन अहिले राष्ट्रिय टोलीका भरपर्दा अलराउन्डर भइसकेका छन्।
नेपाल, ओमान र अमेरिकाबीचको लिग-२ को सिरिजका लागि पहिलो पटक राष्ट्रिय टोलीमा परेका गुलशनले सेप्टेम्बर २०२१ मा अमेरिकाविरूद्धको खेलबाट नेपालको राष्ट्रिय टोलीमा डेब्यू गरेका हुन्।
त्यसअघि उनले २०७७ चैतमा भएको मेयर्स कपमा उत्कृष्ट प्रदर्शन गरेका थिए।
गुलशन ६ फिट १ इञ्च अग्ला छन्। सर्लाही मलंगवाका गुलशनलाई क्रिकेटर बनाउन उनका बुवाको ठूलो भूमिका छ।
२०७३ सालतिर बुवाले गुलशनलाई भारतको राँचीस्थित अरूणोदय क्रिकेट एकेडेमीमा भर्ना गरेका थिए।
राँचीमा क्रिकेट सिक्दा गुलशनले बलिङमा निखार ल्याए। त्यहाँ उनले स्थानीय प्रतियोगिता पनि खेलेका थिए। एकेडेमीमा सिकेका धेरैले भारतको प्रतिष्ठित रणजी ट्रफी खेलिरहेको गुलशनको भनाइ छ।
२०७७ सालको मेयर्स कपमा उनी चर्चामा आएका थिए।
कीर्तिपुरस्थित त्रिवि मैदानमा भएको काठमाडौं मेयर्स कपको उपाधिका लागि सशस्त्र प्रहरी बलको एपिएफ क्लब र नेपाल पुलिस क्लबबीच प्रतिस्पर्धा भएको थियो।
दुवै क्लबमा राष्ट्रिय टिमबाट खेलिसकेका खेलाडीको बाहुल्यता भएकाले खेल प्रतिस्पर्धात्मक हुने अपेक्षा थियो। तर खेल एकपक्षीय बन्यो। पहिले ब्याटिङ गरेको एपिएफ क्लबले कमजोर ब्याटिङ गर्यो। त्यो बेला १५ वर्ष उमेर भएका पुलिसका युवा बलर गुलशन झा एपिएफका ब्याट्सम्यानमाथि हाबी बने।
पुलिसबाट खेलेको दोस्रो खेलमै तीव्र गतिका बलर गुलशनले खेलमा चार विकेट लिए। एपिएफका सुरूआती चारमध्ये तीन ब्याट्सम्यानलाई आफ्नो सिकार बनाए।
त्यति बेला एपिएफका कप्तान शरद भेषवकरले पुलिसका बलर गुलशनले उत्कृष्ट बलिङ गर्दा आफूहरूले कमजोर ब्याटिङ गरेको बताए। उनले गुलशनलाई 'सरप्राइज प्याकेज' को संज्ञा दिएका थिए।
राष्ट्रिय प्रतियोगितामा प्रभावशाली खेल देखाएका गुलशनले त्यसपछि राष्ट्रिय टिममा पर्ने लक्ष्य लिएका थिए। दुई वर्षमै उनी राष्ट्रिय टिममा मात्र परेनन्, तीव्र गतिका बलरबाट उत्कृष्ट अलराउन्डर हुँदै आफ्नो क्षमता प्रमाणित गरे।
गुलशनको ४९ रन लागेन काम
आइतबार कीर्तिपुरस्थित त्रिवि मैदानमा कर्णाली याक्समाथि ५ विकेटको जित निकाल्दै काठमान्डु चौथो खेलमा विजयी भयो।
अन्तिम खेलअघि ८ अंक जोडेको काठमान्डु अंक तालिकाको दोस्रो स्थानमा पुगेको छ। अब उसले पोखरासँग अन्तिम खेल खेल्नेछ। उक्त खेलमा पराजय भोगे पनि अरु टोलीको नजिताको आधारमा काठमान्डु शीर्ष चारमा रहेर प्लेअफमा पुग्नसक्छ। अब काठमान्डुलाई विराटनगर किंग्स, चितवन राइनोज र लुम्बिनी लायन्सले मात्र पछि पार्न सक्छ।
यता कर्णाली भने पाँच मध्ये चार खेलमा पराजित भइसकेको छ। अब उसले बाँकी दुवै खेलमा जित निकालेको अवस्थामा प्लेअफमा पुग्नसक्छ। त्यसका लागि अरु टोलीको नतिजामा भर पर्नु पर्छ।
चौथो जित निकाल्ने क्रममा काठमान्डुले आइतबार कर्णालीले दिएको १५० रनको लक्ष्य १८ ओभरमा ५ विकेटको क्षतिमा पूरा गर्यो।
काठमाडौंका ओपनिङ ब्याटर आकाश त्रिपाठी ८ रनमा आउट भए पनि अर्का ओपनर बने चार्ल्सवर्थले ३४ रनको योगादन गरे। उनले २१ बलमा २ चौका र ३ छक्का प्रहार गरे। कर्णालीका कप्तान सोमपाल कामीविरूद्ध उनले एकै ओभरमा तीन छक्कासहित २० रन जोडेर आक्रामक सुरूवात दिलाएका थिए। तर उनी आठौं ओभरमा पवन सर्राफबाट बोल्ड हुन पुगे।
त्यसपछि मिलिन्द कुमार ११औं ओभरमा रनआउट हुन पुगे। गेराल्ड इरासमसँग रन लिने विषयमा असझदारी हुँदा उनी १५ रन बनाएर पेभिलियन फर्किए।
इरासमस र जोन सिमसनको जोडीले चौथो विकेटका लागि ७६ रनको साझेदारी गर्दै काठमान्डुलाई जित दिलाए। जितका लागि एक रन चाहिएको स्थितिमा सिमसन ४१ रनमा आउट भए। उनले २१ बलमा ४ चौका र २ छक्का प्रहार गरे। लगत्तै अर्को बलमा रशिद खान पनि क्याच भए। इरासमसले ३३ बलमा २ चौका र २ छक्काको मद्दतमा नटआउट ४३ रन प्रहार गरे।
बलिङमा कर्णालीका नन्दन यादवले ३ विकेट लिए। उनले चार ओभरमा ३५ रन दिए।
त्यसअघि टस जितेर पहिले ब्याटिङ गरेको कर्णालीले ७ विकेटको क्षतिमा १४९ रन बनायो।
कर्णालीका लागि गुल्सन झाले उत्कृष्ट ब्याटिङ गर्दै २२ बलमा नटआउट ४९ रन जोडे। गुल्सनले ६ चौका र ३ छक्का प्रहार गरे।
कर्णालीको सुरूवात भने खराब रह्यो। पहिलो बलमै ओपनर प्रियांक पाञ्चाल करण केसीको बलमा कट एन्ड बउल्ड भए हुँदा रोयल डक भए। पहिलो ओभरकै अन्तिम बलमा विलियम बोसिस्टोलाई शाहब आलमले रनआउट गरेपछि उसले पहिलो ओभरमै दुई विकेट गुमायो।
त्यसपछि तेस्रो विकेटका लागि मार्क वाट र पवन सर्राफले ५८ रनको साझेदारी गरे। वाट पनि नवौं ओभरमा भीम सार्कीबाट डाइरेक्ट हिटमार्फत् रनआउटको सिकार बने। उनले ३० रन बनाउने क्रममा २७ बलमा १ चौका र २ छक्का प्रहार गरे।
पवन सर्राफले ३५ रन बनाउने क्रममा २९ बलमा २ चौका र २ छक्का प्रहार गरे। उनी १२औं ओभरको पहिलो बलमा सन्तोष यादवको एलबिडब्लूको धरापमा परे। नाजिबुल्लह जाद्रान १४ बलमा १२ रन बनाएर पेभिलियन फर्के।
कप्तान सोमपाल कामी ६ रनमा मिलिन्द कुमारबाट कट एन्ड बउन्ड भएका थिए। १९औं ओभरको अन्तिम बलमा दिपक डुम्रे १० रनको स्थितिमा रशिद खानबाट बोल्ड भए।
बलिङमा काठमान्डुका रशिद खानले २ विकेट लिए। उनले ४ ओभरमा ३७ रन दिए। करण केसी, मिलिन्द कुमार र सन्तोष यादवले १-१ विकेट लिए।
-1746009348.jpg)
