जेनजी आन्दोलनका कारण एभरेस्ट महिला भलिबल लिग पनि प्रभावित भयो।
पोखरा रङ्गशालाको कभर्ड हलमा भएको प्रतियोगिता आन्दोलनका कारण लिग चरणका खेल जारी रहँदा स्थगित गरिएको थियो।
६ वटा फ्रेन्चाइज टोलीले भाग लिएको लिगका ९ खेल सकिएपछि स्थगित भयो। लिगका ६ र फाइनल गरी ७ खेल बाँकी छन्।
आयोजकले छिट्टै प्रतियोगिताका बाँकी खेल गर्ने जनाएको छ।
आन्दोलन क्रममा विदेशी खेलाडी बसेका होटलमा आन्दोलनकारीले आगो नै लगाए। यो घटनामा ती खेलाडीका सरसामान पनि जल्न पुग्यो। खेलाडीले आग्रह गर्दागर्दै आन्दोलनकारीले उनीहरूका सरसामानमा क्षति पुर्याए।
लिगका लागि ११ देशका १८ विदेशी खेलाडी पोखरा पुगेका थिए।
‘हामीले पटकपटक आग्रह गर्दा पनि खेलाडीको सामान निकाल्न दिइएन। त्यसबेला विदेशी खेलाडीहरू धेरै आत्तिनुभयो। यो देशमा कहिल्यै आउँदैनौँ भन्नुभयो,’ आयोजक टिमका एक सदस्यले भने, ‘त्यो सुन्दा धेरै दुख लाग्यो। साँच्चै अब उहाँहरू आउनुहुन्छ जस्तो लागेन। अरूलाई पनि नेपाल सुरक्षित छैन भन्नुभयो अर्को क्षति व्यहोर्नुपर्छ।’
आयोजकका प्रमुख आमिर अख्तरले पनि बीचमा नै आयोजना प्रभावित हुँदा क्षति व्यहोर्नुपरेको र अहिले नै यति क्षति भयो भन्ने अवस्थामा नरहेको उल्लेख गरे।
‘आँट गरेर यो आयोजना गर्यौँ। तर अनपेक्षित घटना भयो। यसले सबै फ्रेन्चाइज लिगलाई असर पर्नेछ,’ उनले भने, ‘यो घटनाले अर्थतन्त्रमा पनि असर परेको छ। एउटा व्यावसायिक खुसी भएर नै खेलमा प्रायोजन गर्छन्। तर अब उहाँहरू खुसी हुनुहुन्न। त्यसैले नेपाली खेलकुदका लागि यो ठूलो घाटा हो। अबको एक वर्ष ठूलो क्षति बेहोर्नुपर्नेछ।’
उनले यो घटनाका कारण विदेशी खेलाडीहरू त्रसित भए पनि आफूहरूले सम्झाएको उल्लेख गरे।
‘११ राष्ट्रका १८ जना विदेशी महिला खेलाडी हुनुहुन्थ्यो। त्यो घटना हुँदा आत्तिनुभयो। महिलाहरू त्यसै पनि संवेदनशील हुनुहुन्छ। होटलमा जसरी आक्रमण भयो र त्यो सहन नसक्ने अवस्थामा नै थियो। २-४ जना खेलाडीको कागजात र सामान त्यहीँ जले। जसोतसो पासपोर्ट जोगायौँ,’ उनले भने, ‘हामीले ती खेलाडीहरूसँग बसेर एक सत्र राखेका थियौँ। नेपाल शान्त देश हो र यस्तो पहिलो पटक भयो। यस्तो हुन्छ भन्ने आकलन पनि थिएन भन्यौँ। बाहिर नराम्रो सन्देश नलैजानुस् भन्यौँ। कोही खेलाडी अब आउन चाहँदैनन्। केही आउन पनि सक्छन्। हिजो मात्र खेलाडी जानुभयो र अब यो आयोजना कहिले हुन्छ भन्न सक्दैनौँ।’
उनले भारतका एमपी विक्रम साहनी र भारतीय दूतावासको सहयोगमा ब्रोडकास्टिङ टिमलाई आफ्नो देश पठाउन सफल भएको बताए।
‘कठिन समयमा एकताबद्ध भएर अगाडि बढ्न सक्छौँ भन्ने सन्देश दियौँ। आयोजक, फ्रेन्चाइज टोली, ब्रोडकास्टिङ क्रू र भेन्डर मिलेर खेलाडीमाथि कुनै घटना हुन दिएनौँ र एक भएर लड्यौँ। तर, त्यो घटनालाई रोक्न सक्थेनौँ,’ उनले भने।
-न्यूज एजेन्सी नेपालले पठाएको सामग्रीको सम्पादित अंश
-1746009348.jpg)
