फिल्म 'एक्टरः टेक वान' को फर्स्टलुक पोस्टर सार्वजनिक गरिएको छ।
निर्माण टिमले बिहीबार सार्वजनिक गरेको फर्स्टलुकमा फिल्मका मुख्य कलाकार प्रदीप खड्का फिचर्ड छन्।
पोस्टरमा उनी पाँचवटा अवतारमा छन्।
उनलाई घाइते, नेपाली पोसाकमा रहेको तस्बिर, पाइलटको पोसाकमा रहेको तस्बिर, लामो कपालमा क्याजुअल पोसाकमा रहेको तस्बिर र हल्का जाडोमा स्वीटर लगाएका गरी पाँच लुकमा देखाइएको छ।
यीमध्ये टाउका र अनुहारभरी चोट लागेको लुकले पोस्टरमा प्राथमिकता पाएको छ। पोस्टरलाई रोयल भिमसेनले डिजाइन गरेका हुन्।
राजन भुसालको निर्देशन रहेको 'एक्टरः टेक वान' मा प्रदीपसँगै डेब्यु अभिनेत्री दिव्या रायमाझी मुख्य भूमिकामा छन्। आना शर्मा, राजबल्लभ कोइराला, दिव्य देव, सुशील सिटौला, उषा रजक, सिर्जना अधिकारी, अनुज पाण्डे, बादल भट्ट, प्रदीप कुमार चौधरी (पीके), देवेन्द्र नेपाललगायतका कलाकारहरूको समेत अभिनय छ।
अभिनेता खड्काले पहिलो पटक फिल्ममा आना र दिव्यासँग सहकार्य गरेका हुन्।
थमन कुमारी भण्डारी फिल्मका निर्माता हुन्। अदृत फिल्मस् र मोती फिल्मस्को प्रस्तुति रहेको फिल्ममा अनिश भुसाल सह–निर्माता, मोती कार्की क्रियटिभ प्रोड्युसर छन्।
आकाश बराल र राजन भुसालले फिल्मलाई लेखेका हुन्। नरेन्द्र मैनालीको छायांकन शिशिर खाती र किरण थापाको कोरियोग्राफी, अष्ट महर्जनको द्वन्द्व रहेको फिल्मलाई निमेश श्रेष्ठले सम्पादन गर्दैछन्।
यो फिल्म यस वर्षको तिहारको अवसर पारेर कात्तिक १५ गते लक्ष्मीपूजामा रिलिज हुनेछ।
