निर्देशक तथा अभिनेता निश्चल बस्नेत र अभिनेत्री स्वस्तिमा खड्काको मुख्य भूमिका रहेको फिल्म 'बेहुली फ्रम मेघौली' को टिजर सार्वजनिक भएको छ। हलमा गत हप्ता नै रिलिज भएको टिजर युट्युबमा आज सार्वजनिक गरिएको हो।
विवाहको सन्दर्भलाई समेटिएको टिजर रमाइलो छ।
छोरीलाई विवाहका लागि मनाउन परिवारले गरेको प्रयासलाई टिजरमा देखाइएको छ। विवाहका लागि छोरीले विभिन्न स्वभावका केटालाई हेरेको देखाइएको छ। अभिनेत्री स्वस्तिमा विवाहका लागि दुलाह खोजिरहेकी ३० वर्षीया युवतीको रूपमा देखिएकी छन्।
अभिनेता निश्चल बस्नेतलाई अष्ट्रेलिया रिटर्न युवाको रूपमा प्रस्तुत गरिएको छ। समग्रमा टिजर सामाजिक कथामा कमेडी मिश्रित छ।
साजन काफ्ले र आकाश बरालको लेखन तथा निर्देशन रहेको फिल्ममा निश्चल र स्वस्तिमाका साथमा बसुन्धरा भुषाल, बिजय बराल, सिमरन खड्का, लोकेन्द्र लेखक, रक्षा थापा, सिरू बिष्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली र रामबाबु रेग्मीको अभिनय छ।
ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको फिल्मको निर्माता निश्चल र स्वस्तिमा स्वयंम हुन्। कार्यकारी निर्माता फिरोज खड्का र शंकर पाण्डे हुन्।
अभिनेता विजय बराल कास्टिङ डाइरेक्टर रहेको फिल्ममा नरेन्द्र मैनालीको छायांकन, प्रदीप लामा र केवीका खत्रीको कोरियोग्रफी, जयन जे वाइवा र कुशल पोखरेलको संगीत, निमेष श्रेष्ठको सम्पादन, घनश्याम श्रेष्ठको प्रोडक्सन डिजाइन र केशव पाण्डे र लक्ष्मण पाण्डेको स्टील फोटोग्राफी छ।
फिल्मलाई एप्पल इन्टरटेनमेन्ट र डिसिएनले वितरण गर्दैछन्। यो फिल्म दसैंको घटस्थापना अर्थात् असोज १७ गतेबाट प्रदर्शनमा आउँदैछ।
