'नाइँ नभन्नू ल ४' बाट फिल्मी करिअर सुरू गरेकी आँचल शर्माले एक दर्जन हाराहारी सिनेमामा अभिनय गरेकी छन्।
गत चैतमा रिलिज 'डिग्री माइला' उनको पछिल्लो प्रदर्शन फिल्म हो। आउँदो शुक्रबार आँचल अभिनीत नयाँ फिल्म ‘वर एण्ड वधु’ रिलिज हुँदैछ।
यसपछि उनीसँग केही फिल्म पाइपलाइनमा छन्।
आँचलले फिल्म 'पिताम्बर' मा काम गर्दैछिन्। कृषा चौलागाईँको निर्देशन रहने यो फिल्ममा कलाकारहरूको लाइनअप बलियो छ। यसमा प्रदीप खड्का, सौगात मल्ल, दयाहाङ राई, आर्यन सिग्देल, सुरक्षा पन्त लगायत थुप्रै कलाकारहरूले अभिनय गर्दैछन्।
त्यस्तै आँचलले फिल्म 'जेरी अनटप' मा अनमोल केसीसँग सहकार्य गर्दैछिन्। सुयोग गुरूङको निर्देशन रहने यो फिल्ममा जसिता गुरूङ पनि शीर्ष भूमिकामा रहनेछिन्। यो आँचल र अनमोलको पहिलो सहकार्य हुनेछ।
आँचल फिल्म 'दु:खी आत्मा' मा पनि अनुबन्धित छिन्। दीपेन्द्र लामाको लेखन एवं निर्देशन रहने यो फिल्मको अभिनेतामा दयाहाङ राई अनुबन्धित छन्। यो दयाहाङसँग आँचलको दोस्रो सहकार्य हुनेछ।
फिल्म 'राजमहल' मा पनि आँचलले काम गर्दैछिन्। यो फिल्मको गतवर्ष निर्माण घोषणा गरिएको थियो। छायांकन भने सुरू हुन सकेको छैन।
सविनकुमार तोलांगीको निर्देशन रहने फिल्ममा रमेश उप्रेती, सलोन बस्नेतलगायतको अभिनय रहने जानकारी दिइएको थियो।
आँचलले छायांकन सकेका 'एक मुठ्ठी बादल' लगायतका फिल्म प्रदर्शन हुन बाँकी छन्।
म्युजिक भिडिओमा समेत आँचल उत्तिकै खोजिने गरेकी छन्।
