पारिवारिक कथामा बनेको फिल्म 'सानो संसार' को गीत 'मग मग फूलबारी' सार्वजनिक गरिएको छ।
सोमबार श्रीकृष्ण जन्माष्टमीको अवसर पारेर काठमाडौंमा आयोजित एक कार्यक्रमकाबीच फिल्मको गीत रिलिज गरिएको हो।
गीतमा राजनराज शिवाकोटी र मेलिना राईको स्वर छ। गीतको शब्द र संगीत पनि राजनराजकै हो।
विवाहको सेटअपमा तयार पारिएको गीतको भिडिओमा फिल्मका प्रायः सबै मुख्य कलाकारहरू फिचर्ड छन्। सुज्जन खड्का र मनोज खड्काले भिडिओको कोरियोग्राफी गरेका हुन्।
सिद्धार्थ पुडासैनीको निर्देशनमा तयार फिल्मलाई अर्जुन कुमारले निर्माण गरेका हुन्।
फिल्ममा हास्य कलाकार केदार घिमिरे ‘माग्नेबुढा’ की श्रीमती सीतादेवी तिमल्सेनाको मुख्य भूमिका छ। साथमा राज पंगेनी शर्मा, अनु दाहाल, अन्जसा रिजाल, शिशिर सिवाकोटी, सरिता भण्डारी र जीवन गौतमको अभिनय छ। यी सबै कलाकारले नेपाली रजतपटमा डेब्यु गरेका हुन्।
निर्देशक पुडासैनी र सरिष्मा खत्रीको लेखन रहेको फिल्ममा माधव वाग्ले कार्यकारी निर्माता छन्।
फिल्म असोज ११ गतेदेखि प्रदर्शनमा आउने तयारीमा छ।
