यही शुक्रबारदेखि प्रदर्शनको तयारीमा रहेको फिल्म हो 'बाटो– रोड टु डेथ'।
सामान्य प्रचारप्रसारका साथ रिलिज हुन लागेका कारण फिल्मको चर्चा धेरै छैन। तीन साताअघि युट्युबमा यसको टिजर र दुई साताअघि ट्रेलर सार्वजनिक गरिएको थियो। त्यसले पनि तुलनात्मक रूपमा धेरै भ्युज पाएको देखिँदैन।
टिजर र ट्रेलर धेरैको नजरमा नपरे पनि हेरेका दर्शकबाट यसले प्रशंसा पाइरहेको छ।
कतिपयले आफ्नो सामाजिक सञ्जालमा फिल्मको प्रचार सामग्री राख्दै 'बाटो– रोड टु डेथ' ले नेपाली सिने क्षेत्रमा आशा जगाएको बताएका छन्। यसको कथा, प्रस्तुति, छायांकन, पार्श्व संगीत लगायत समग्र पक्षमा नयाँपन देखिएको दर्शकको प्रतिक्रिया देख्न सकिन्छ।
फिल्मका लेखक एवं निर्देशक मदन थापा नयाँ विधा (जनरा) मा स्तरीय फिल्म बनाउने प्रयास गरेको बताउँछन्।
'कलाकारको प्रस्तुतिदेखि फिल्मको समग्र पक्षको गुणस्तरमा एकदमै नौलो स्वाद दिने प्रयास गरेका छौं,' मदनले भने, 'नेपाली दर्शकले त्यो पाउँछन् भन्नेमा ढुक्क छौं।'
थ्रिलर जनराको 'बाटो– रोड टु डेथ' एक दिनको यात्राको कथा हो।
मदन यसलाई 'रोड थ्रिलर' फिल्म भन्छन्। जनरा अलग भए पनि व्यावसायिक खालकै फिल्म बनाएको उनले बताए।
'थ्रिल, एक्सन, ड्रामा, सेन्टिमेन्ट, कमेडी सबै चिज राखेर प्याकेजिङ गरेका छौं,' उनले भने।
एकजना स्वास्थ्यकर्मी मुटु प्रत्यारोपणका लागि मुटु लिएर काठमाडौंबाट धरानको यात्रामा निस्किन्छिन्। सोही क्रममा बाटोमा हुने घटनाहरू फिल्मको कथा हो।
यो एक पारिवारिक कथा पनि हो। फिल्मले परिवारको महत्त्व कति छ भन्ने पनि देखाउने मदनले बताए।
निर्माणका हिसाबले हलिउड र अन्य देशका सिनेमा हेर्ने दर्शकका लागि नयाँ नलागे पनि नेपालको सन्दर्भमा नयाँ प्रयास भएको उनी बताउँछन्। फिल्म दर्शकले रूचाएमा नयाँ प्रयास गर्न खोज्ने निर्देशकलाई हौसला मिल्ने उनको भनाइ छ।
मदन आफै नेपाली फिल्मका लागि नयाँ हुन्। 'बाटो– रोड टु डेथ' उनले बनाएको पहिलो फिल्म हो।
भारतको चेन्नईमा रहेर दक्षिण भारतीय (साउथ इन्डियन) फिल्ममा काम गरेको उनको अनुभव छ। त्यही अनुभव उनले यो फिल्ममा प्रयोग गरेका छन्।
पुर्ख्यौली घर बागलुङ भएका मदन भारतको चेन्नईमै जन्मे, हुर्के र पढे। उनलाई सानैदेखि फिल्मप्रति रूचि थियो। परिवारको साथ पनि भयो। त्यहाँको सत्यभामा युनिभर्सिटीबाट उनले फिल्ममा ग्र्याजुएट गरे। त्यसपछि 'युद्दम् शरणम्' सहित केही साउथ इन्डियन फिल्ममा सह-निर्देशक भएर काम गरेको उनी बताउँछन्। केही छोटा फिल्म, विज्ञापनमा समेत उनले काम गरेर अनुभव बटुले।
नेपाल आएर नेपाली फिल्मबाटै निर्देशनमा 'डेब्यु' गर्दा गर्व महसुस भइरहेको उनी बताउँछन्।
'जन्मेको भारतमा भए पनि मान्छे र मन नेपाली नै हो। आमाबुबाले नेपालको कुरा गर्दा देशप्रति छुट्टै माया लाग्थ्यो। बेलाबेला नेपाल आउँदा यहाँका फिल्म पनि हेर्थेँ। अहिले नेपाली फिल्मबाटै डेब्यु गर्न पाउँदा खुसी छु,' उनले भने।
मदनले कोरोना महामारीको समयमा चेन्नईमा हुँदै 'बाटो– रोड टु डेथ' को स्क्रिप्ट लेखेका थिए। यो फिल्म तमिल भाषामा बनाउने योजना थियो।
चार वर्षअघि दसैंमा नेपाल आउँदा उनको भेट काठमाडौं फिल्मस्का चन्दन झासँग भयो। त्यो भेटमा उनले आफूले बनाउने सोचेको फिल्मको कथा सुनाएका थिए।
'उहाँको चाहना नयाँ, नौलो कुरा नेपाली फिल्ममा ल्याउने थियो। हाम्रो भिजन मिल्यो। त्यसपछि नेपाली फिल्म बनाउने तयारी अगाडि बढायौं,' उनले भने।
सुरूमा लेखेको कथामा नेपाली परिवेश मिसाउँदै दर्शकलाई कसरी सजिलो गरी जोड्ने भन्नेमा उनीहरूले ध्यान दिए।
फिल्मको कार्यशालामा त अंग्रेजीमै स्क्रिप्ट सुनाइएको थियो। त्यस क्रममा निर्देशक तथा रंगकर्मी सुलक्षण भारती र आशान्त शर्माले यसलाई नेपालीकरण गर्न सहयोग गरेको मदनले बताए।
यो फिल्ममा मिथिला शर्मा, आशान्त शर्मा, पशुपति राई, उत्पल झा, रक्षा थापा, सुलक्षण भारती लगायतले अभिनय गरेका छन्।
'सबै कलाकारले राम्रो काम गर्नुभएको छ,' मदनले भने।
उनले अधिकांश कलाकार रंगमञ्चबाट लिएर काम गरेका छन्। यसको पछाडि केही कारण रहेको उनी बताउँछन्।
'यो फिल्म नेपालभित्र मात्रै चलाउन बनाएको भए नाम चलेका स्टार-कलाकार लिँदा फाइदा हुन सक्थ्यो। तर नेटफ्लिक्स, प्राइम भिडिओमा आउने वर्ल्ड सिनेमाका प्रायः कलाकार नयाँ र हामीले नचिनेका अनुहार हुन्छन्। उनीहरूको अभिनय दमदार हुन्छ र अभिनयले नै आकर्षित गर्छ,' मदनले भने, 'अर्कातिर स्टार-कलाकार लिँदा समय मिलाउन पनि गाह्रो हुन्छ भन्ने लाग्यो। खासगरी हामीले फिल्मलाई विदेशी बजारमा समेत लैजाने हिसाबले काम गरेका हौं।'
नेपाल बाहिर पनि लैजान सजिलो होस् भन्ने सोचले नै अलग जनरामा फिल्म बनाएको मदनले बताए। यस्तो कथा ओटिटी प्लेर्टफर्म नेटफ्लिक्स, अमेजन प्राइम भिडिओहरूमा लैजान सजिलो हुने उनको विश्वास छ। ओटिटी प्लेटफर्ममा लैजाने सोचले तोकिएको मापदण्ड अनुसारको गुणस्तरमा आफूहरूले काम गरेको समेत उनले बताए।
'बाटो– रोड टु डेथ' को पोस्ट-प्रोडक्सनको सबै काम भारतमै भएको हो। भिएफएक्स, कलर, ब्याकग्राउन्ड म्युजिक, मिक्सिङ सबै काम चेन्नईमा गरिएको मदनले बताए।
दक्षिण भारतीय फिल्मकै छायांकारले खिचेको फिल्म सम्पादन भने मदनले नै गरेका हुन्। नेपाल रिलिजपछि फिल्म हिन्दी, तमिल, तेलुगू र अंग्रेजीमा डब गरेर दर्शकमाझ ल्याउने तयारी छ।
गुणस्तरमा सम्झौता नगरी काम गरिएको र अलग विधाको भएकाले दर्शकलाई मनपर्ने कुरामा विश्वस्त रहेको मदनले बताए।
'अहिले फिल्मकर्मीभन्दा दर्शक चलाख छन्। निर्माताले जे बनाउँछन्, त्यही हेर्नुपर्ने जमाना गयो। हामीले चाहेको होइन, दर्शकको चाहनाअनुसार फिल्म दिनुपर्छ,' उनले भने।
कुनै नयाँ कुरा स्वीकार गरेपछि मात्रै परिवर्तन भएर नयाँ चरणमा पुग्न सकिने उनी बताउँछन्।
'हामीले नयाँ प्रयास गरेका छौं। यसलाई माया गरिदिनुभयो भने अझ राम्रो गर्ने ऊर्जा मिल्छ। अलग जनराका फिल्म आउने क्रम बढ्छ। दर्शकले मात्र होइन, फिल्मकर्मीबाट पनि साथको अपेक्षा राखेका छौं,' मदनले भने।
