विदेशबाट दक्षिण कोरिया भित्रिएका कोभिड–१९ संक्रमित तथा स्वदेशमा नै रहेका तर नियन्त्रणका उपायलाई उल्लङ्घन गर्ने बिरामीले उपचार खर्च आफैं व्यहोर्नु पर्ने भएको छ।
कोरिया सरकारले सोमबारबाट लागु हुने गरी यो व्यवस्था गरेको हो।
स्वास्थ्य अधिकारीहरूका अनुसार कोरियाले विदेशबाट आएका कोभिड-१९ संक्रमित बिरामीहरूलाई उनीहरूको मेडिकल सेवाको लागत भुक्तान गर्न अनुरोध गर्नेछ।
यही अगष्ट २४ देखि देशले कूटनीतिक सम्बन्धमा पारस्परिक सम्बन्धको सिद्धान्तलाई ध्यानमा राखेर विदेशीहरूलाई फरक रकम लगाउने दक्षिण कोरियाली अधिकारीहरूले बताएका छन्।
अहिलेसम्म दक्षिण कोरियाले स्वदेशी तथा विदेशी सबै कोभिड–१९ विरामीहरूलाई निःशुल्क चिकित्सा सेवाहरू प्रदान गर्दै आएको थियो।
महामारी लामो समयसम्म अन्त्य नहुँदा करदाताहरूलाई थप भार पर्ने भन्दै सरकारले विदेशी बिरामीहरूलाई बोझ बाँड्न आह्वान गरेको हो। दक्षिण कोरिया यसको निःशुल्क शुल्कको उपचार नीति परिवर्तन गर्दा आउने कूटनीतिक समस्याबारे सचेत रहेको छ।
यद्यपि समुदायमा सङ्क्रमण नियन्त्रणका लागि अझै पनि भाइरस संक्रमित विदेशीलाई आवश्यकता अनुसार केही वा सबै खर्चमा छुट दिने सरकारी अधिकारीहरूले बताएका छन्।
दक्षिण कोरियामा विगत पाँच महिना यता आइतबार संक्रमितको सङ्ख्या सबैभन्दा धेरै पुगेको छ। आइतबार संक्रमितको सङ्ख्या २७९ पुगेको थियो भने यो सङ्ख्यामा सोमबार भने सामान्य कमी आउँदा थप १९७ संक्रमित भएका छन्।
दक्षिण कोरियाको राष्ट्रिय रोग नियन्त्रण तथा रोकथाम केन्द्रका अनुसार अहिलेसम्म यहाँ कूल संक्रमितको सङ्ख्या १५ हजार ५१५ पुगेको छ भने ३०५ संक्रमितको मृत्यु भएको छ।
