स्पेनका लागि नवनियुक्त नेपाली राजदूत शनिल नेपालले स्पेनका राजा फेलिपे छैठौंसमक्ष आफ्नो ओहोदाको प्रमाणपत्र प्रस्तुत गरेका छन्।
मंगलबार म्याड्रिडस्थित राजदरबारमा आयोजित एक विशेष समारोहमा उनले आफ्नो ओहोदाको प्रमाणपत्र पेस गरेका हुन्। त्यसपछि उनले राजा फेलिपेसँग नेपाल तथा स्पेनबीच द्विपक्षीय सम्बन्धका बारेमा छोटो वार्ता पनि गरेका थिए।
त्यसअघि विशेष सुरक्षासहित राजदूत नेपालले स्पेनको परराष्ट्र मन्त्रालयमा गएर स्पेनको परराष्ट्र मन्त्रालयमा दक्षिण तथा पूर्वी एसिया हेर्ने उपमहानिर्देशक गिलेर्मो अंगिरासँग औपचारिक भेटघाट गरेका थिए। प्यालेस द सान्ता क्रुजमा स्पेनको रोयल गार्डले राजदूत नेपाललाई सम्मान गारद अर्पण गरेको थियो।
उक्त अवसरमा नेपालको राष्ट्रिय गान पनि बजाइएको थियो।
म्याड्रिडस्थित नेपाली दूतावासले एक विज्ञप्ति जारी गर्दै स्पेनका नरेश तथा राजदूत नेपालबीच दुई मुलुकहरूबीच सम्बन्ध विस्तार र आपसी हितका बारेमा छलफल भएको जनाएको छ।
राजदूत नेपाललाई बधाई दिनुका साथै राजा फेलिपेले युवा अवस्थामा पर्यटकको रूपमा नेपालको अनौपचारिक भ्रमणको सम्झना गरे। उनले फेरि कुनै दिन नेपाल जाने आफ्नो इच्छा रहेको बताए।
राजा फेलिपेले राजदूत नेपालको सफल कार्यकालको कामना गर्दै बितेका वर्षहरूमा नेपाल तथा स्पेनबीच सम्बन्ध विस्तार हुँदै गएकोमा खुसी पनि व्यक्त गरे।
सो अवसरमा राजदूत नेपालले राष्ट्रपति रामचन्द्र पौडेलको सन्देश सुनाएका थिए।
राजदूत नेपालले परराष्ट्र नीतिदेखि लिएर नेपालको विकास योजना र कार्यक्रम लगायतका विविध विषयमा पनि राजा फेलिपेलाई अवगत गराएका थिए। उनले जलवायु परिवर्तनका कारण नेपालले भोग्नु परिरहेको असरबारे चर्चा गर्दै जलवायु परिवर्तन लगायतका समस्यासँग जुध्न अन्तर्राष्ट्रिय सहयोग आवश्यक रहेको बताए।
उनले दुई देश र जनताबीच विद्यमान द्विपक्षीय सम्बन्ध र सहयोगलाई थप सुदृढ गर्न अथक प्रयास गर्ने प्रतिबद्धता समेत व्यक्त गरे।
समारोहमा स्पेनको विदेश मन्त्रालयका चिफ अफ प्रोटोकल तथा महासचिव, राजदरबारका चिफ प्रोटोकल अफिसर, नेपाली दूतावासका कर्मचारीहरू तथा स्पेनी सञ्चार माध्यमका प्रतिनिधिहरू पनि उपस्थित थिए।
राष्ट्रपति रामचन्द्र पौडेलले गत मंसिर २८ गते नेपाललाई स्पेनका लागि राजदूतमा नियुक्त गरेका थिए।
पछिल्लो समय माल्टालाई स्पेनस्थित नेपाली दूतावासलाई जिम्मेवारी तोकिएको छ। माल्टामा नेपाली दूतावास नरहेका कारण नेपाललाई गैरआवासीय राजदूतको जिम्मेवारी दिइएको हो।
राष्ट्रपति रामचन्द्र पौडेलले गत मंसिर २८ गते नेपाललाई स्पेनका लागि राजदूतमा नियुक्त गरेका थिए।
यसअघि शनिल नेपाल पोर्चुगलका लागि राजदूत नियुक्त भएता पनि तत्कालीन सरकारले पोर्चुगल नआउँदै फिर्ता बोलाएको थियो। त्यसपछि नयाँ सरकारले उनलाई गत साउनमा स्पेनका लागि नेपाली राजदूत नियुक्त गर्न सिफारिस गरेको थियो।
नेपाल र स्पेनबीच मे १३, १९६८ मा कूटनीतिक सम्बन्ध स्थापना भएको थियो। नेपाल सरकारले २० फेब्रुअरी २०१७ मा म्याड्रिडमा आवासीय दूतावास खोल्ने निर्णय गरेको थियो।
