मंगलबार पनि नेप्से परिसूचक घटेको छ।
बिहीबार, आइतबार र मंगलबार गरी नेप्से लगातार तीन दिन घटेको हो।
यसदिन नेप्से १.७६ अंकले घटेर २०३३.७६ विन्दुमा बन्द भएको छ।
मंगलबारको बजारमा ३ अर्ब ११ करोड ३५ लाख ५६ हजार ९७८ रूपैयाँको सेयर कारोबार भएको छ।
गत कारोबार दिन अर्थात् आइतबार ३ अर्ब ७७ करोड ५४ लाख २२ हजार १९६ रूपैयाँको सेयर कारोबार भएको थियो।
आइतबारको तुलनामा आज कारोबार रकममा ६६ करोड रूपैयाँ कमी आएको हो।
यस दिन ३१४ वटा धितोपत्रको ९३ लाख ४२ हजार ५४६ कित्ता सेयर किनबेच भएको हो।
आइतबार ९० कम्पनीको सेयर मूल्य बढेको छ भने १५० वटाको घटेको छ। यस्तै, ९ कम्पनीको सेयर मूल्य स्थिर रहेको छ।
यसदिन बोटलर्स नेपाल (बालाजु) र समाज लघुवित्तको सेयरमूल्य १० प्रतिशतका दरले बढेको छ। उक्त कम्पनीको सेयर मूल्य क्रमशः ११ हजार २६७ रूपैयाँ १० पैसा र एक हजार ७९८ रूपैयाँ ७० पैसा कायम भएको छ।
ग्रीन लाइफ हाइड्रोपावरको सेयर मूल्य सर्वाधिक १० प्रतिशतले घटेको छ। उक्त कम्पनीको सेयर मूल्य २१८ रूपैयाँ ७० पैसामा झरेको छ।
यस्तै, किसान लघुवित्तको सेयरमूल्य ७.७१ प्रतिशतले घटेको छ। उक्त कम्पनीको सेयरमूल्य ८४९ रूपैयाँ कायम भएको छ।
मंगलबार हिमालयन रिइन्स्योरेन्सको सर्वाधिक कारोबार भएको छ।
उक्त कम्पनीको प्रतिकित्ता ६५० रूपैयाँमा ३१ करोड ७३ लाख बराबरको सेयर कारोबार भएको हो।
यो मूल्य अघिल्लो दिनको तुलनामा ४.७९ प्रतिशत बढेको हो।
सर्वाधिक सेयर खरिद–बिक्री हुने दोस्रो कम्पनीमा साना किसान लघुवित्तको संस्थापक सेयर रहेको छ। उक्त कम्पनीको प्रतिकित्ता १०० रूपैयाँमा १२ करोड ४० लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये ५ समूहको परिसूचक बढेको छ भने बाँकी ८ समूहको परिसूचक घटेको हो।
यसदिन अन्य समूहको परिसूचक सर्वाधिक १.१० प्रतिशतले बढेको छ।