मंगलबार नेप्से परिसूचक दोहोरो अंकले बढेको छ।
लगातार चार कारोबार दिन घटेको बजार यस दिन भने १०.१४ अंकले बढेको हो।
यसदिन नेप्से ०.४९ प्रतिशतले बढेर २०४१.७० विन्दुमा बन्द भएको छ।
मंगलबारको बजारमा २ अर्ब ३५ करोड ४३ लाख ४८ हजार ५०३ रूपैयाँको सेयर कारोबार भएको छ।
गत कारोबार दिन अर्थात् सोमबार २ अर्ब ४८ करोड ९१ लाख १८ हजार ४८५ रूपैयाँको कारोबार भएको थियो।
अघिल्लो दिनको तुलनामा कारोबार रकममा १३ करोड रूपैयाँ कमी आएको हो।
यस दिन ३१० वटा धितोपत्रको ६८ लाख ४२ हजार ३९२ कित्ता सेयर किनबेच भएको हो।
मंगलबार १६८ कम्पनीको सेयर मूल्य बढेको छ भने ६८ वटाको घटेको छ। यस्तै, १० कम्पनीको सेयर मूल्य स्थिर रहेको छ।
दोल्ती पावरको सेयर मूल्य सर्वाधिक १० प्रतिशतले बढेको छ। उक्त कम्पनीको प्रतिकित्ता मूल्य ४३० रूपैयाँ १० पैसा कायम भएको छ।
यस्तै, सर्वोत्तम सिमेन्टको सेयर मूल्य ९.९९ प्रतिशतले बढेर प्रतिकित्ता मूल्य ८९५ रूपैयाँ १० पैसा कायम भएको छ।
धौलागिरी लघुवित्तको मूल्य सर्वाधिक ९.३५ प्रतिशतले घटेको छ। उक्त कम्पनीको सेयर मूल्य एक हजार ३९९ रूपैयाँ ६० पैसामा झरेको छ।
यस्तै, भगवती हाइड्रोपावरको सेयरमूल्य ४.७५ प्रतिशतले घटेर प्रति कित्ता मूल्य ६१९ रूपैयाँ १० पैसामा झरेको छ।
मंगलबार शिवम् सिमेन्टको सर्वाधिक कारोबार भएको छ।
उक्त कम्पनीको प्रतिकित्ता ५३० रूपैयाँमा ९ करोड ३१ लाख बराबरको सेयर कारोबार भएको हो।
यो मूल्य अघिल्लो दिनको तुलनामा ०.५७ प्रतिशत बढेको हो।
सर्वाधिक सेयर खरिद–बिक्री हुने दोस्रो कम्पनीमा सोनापुर मिनरल्स रहेको छ। उक्त कम्पनीको प्रतिकित्ता ४८७ रूपैयाँमा ८ करोड ५७ लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये वित्त, जीवन बीमा र व्यापार समूहको परिसूचक १ प्रतिशतभन्दा कमले घटेको छ भने बाँकी सबै समूहको परिसूचक बढेको छ।
यसदिन उत्पादन तथा प्रशोधन समूहको परिसूचक सर्वाधिक २.११ प्रतिशतले बढेको छ।
