नेपाल बिजनेस समिट २०२३ को टाइटल स्पोन्सर वर्ल्ड लिंक कम्युनिकेसन हुने भएको छ।
नेपाल सरकार, बैंक तथा वित्तीय संस्था परिसंघ नेपाल र नेपाल बिजनेस इन्स्टिच्युटको संयुक्त आयोजनामा वैशाखको दोस्रो साता हुने बिजनेस समिटमा वर्ल्ड लिंकले साझेदारी गरेको हो।
यो शिखर सम्मेलन ‘वर्तमान आर्थिक परिदृश्य र समृद्धिको मार्गचित्र’ भन्ने मूल नारासहित अन्तर्राष्ट्र्रिय ढाँचामा हुने आयोजकले जनाएको छ।
सम्मेलनमा आर्थिक एवं बैंकिङ क्षेत्रको पछिल्लो आर्थिक अवस्था, टेलिकम्युनिकेसन क्षेत्र र डिजिटल नेपाल फ्रेमवर्क लगायत विषयमा राष्ट्रिय र अन्तर्राष्ट्रिय वक्ताहरूले आफनो प्रतिवेदन पेस गर्ने छन्।
वर्ल्ड लिंकको कार्यालय जावलाखेलमा टाइटल स्पोन्सरका लागि आयोजित हस्ताक्षर कार्यक्रममा वर्ल्ड लिंकका तर्फबाट सञ्चालक मनोज अग्रवाल र नेपाल बिजनेस इन्स्टिच्युटका तर्फबाट कार्यकारी अध्यक्ष विशाल गैरेले हस्ताक्षर गरे।
हस्ताक्षर कार्यक्रममा वर्ल्ड लिंकका सञ्चालक मनोज अग्रवालले डिजिटल प्रविधिसहितको आर्थिक विकास नै समृद्धिको मूल आधार भएकाले उद्ममशीलता र व्यावसायिक प्रवर्द्धनका लागि बिजनेस समिटमा साझेदारी गरेको जानकारी गराए।
त्यसैगरी सम्मेलन मूल आयोजक कमिटीका संयोजक समेत रहेका नेपाल बिजनेस इन्स्टिच्युटका तर्फबाट कार्यकारी अध्यक्ष विशाल गैरेले शिखर सम्मेलनले ठुला उद्योगको संरक्षण, साना, मझौला तथा स्टार्टअप उद्यमलाई प्रोत्साहन गर्ने, लगानीका नयाँ क्षेत्रको पहिचानसहित उत्पादनमूलक, रोजगारीमूलक, निर्यातमूलक क्षेत्रमा लगानी विस्तार गर्ने, उद्यमी–व्यवसायीले भौग्दै आएका नीतिगत र व्यवहारगत समस्या समाधान गर्दै थप लगानी भित्र्याउने, निर्यात प्रवर्द्धन गर्ने र सोका लागि साझेदारी तथा लगानी गरी आत्मनिर्भर अर्थतन्त्रको निर्माणमा टेवा पुर्याउने उद्देश्य राखेको जानकारी गराए।
शिखर सम्मेलनबाट स्वदेशी उत्पादन वृद्धि, उपभोग तथा निर्यात प्रवर्द्धनमा सहयोग पुग्ने, रोजगारीका अवसरहरूको सिर्जना हुने, लगानीका सम्भावित क्षेत्रहरूको पहिचानसहित लगानी विस्तार हुने, युवा तथा महिलाहरू उद्यम/व्यवसायमा आकर्षित हुने, घरेलु, साना, मझौला उद्योगको स्तरोन्नतिसहित नवप्रर्वतन क्षेत्रमा लगानी बढ्ने, बैंक तथा वित्तीय क्षेत्रको दिगो प्रवर्द्धन हुने, तीन तहकै सरकार, निजी क्षेत्र र कुटनीतिक नियोगबीच सम्बन्ध विस्तार भई उच्चस्तरको नेटवर्किङ हुने अपेक्षा राखिएको छ।
सम्मेलनमा नेपाल सरकार र मातहतका निकायका उच्च अधिकारी, वरिष्ठ राजनीतिज्ञ, विज्ञ, र कूटनीतिक नियोग तथा अन्तर्राष्ट्रिय दातृ संस्थाका उच्च अधिकारीहरूको सहभागितामा वृहत नीति संवाद आयोजना गरिने छ।
त्यसैगरी शिखर सम्मेलनकै अवसरमा देशभरका पत्रकारलाई लक्षित गरी 'आर्थिक एवं बैंकिङ क्षेत्रका चुनौती र समृद्धिको मार्गचित्र' विषयक राष्ट्रियस्तरको लेख लेखन प्रतियोगिता समेत आयोजना भइरहेको छ।
सिविफिन, एनबिआई र नेपाल पत्रकार महासंघसमेतको साझेदारीमा चार लाख रूपैयाँ बराबरको फेलोसिप कार्यक्रम गरिएको हो। उत्कृष्ट १५ वटा लेखहरूलाई 'र्याङ्किङ' का आधारमा नगद पुरस्कार र प्रशंसा पत्रबाट पुरस्कृत गरिने छ। सफल उद्यमी/व्यवसायी, करदाता र बैंक तथा वित्तीय संस्थाहरूलाई समेत अर्वाडमार्फत सम्मान गरिने छ। सम्मेलनमा संघीय सरकारका विभिन्न मन्त्रालयहरूले पनि साझेदारी गरेका छन्।
