आर्थिक वर्ष २०८१–८२ मा अर्थतन्त्रमा उपभोगको हिस्सा ९३ प्रतिशत पुग्ने अनुमान गरिएको छ। अर्थमन्त्री विष्णु पौडेलले बिहीबार सार्वजनिक गरेको आर्थिक सर्वेक्षणले यस्तो अनुमान गरेको हो।
उपभोगमा ६.६ प्रतिशतले वृद्धि भएको हो। पछिल्लो एक दशकमा यस्तो उपभोगको हिस्सा ९१.५ प्रतिशत थियो।
कुल गार्हस्थ्य उत्पादनमा सरकारी क्षेत्रको उपभोगको अंश एकल अङ्कमा छ।
चालु आर्थिक वर्ष कुल गार्हस्थ्य उत्पादनमा सरकारी क्षेत्र र निजी क्षेत्रको उपभोगको अनुपात क्रमशः ७.२५ प्रतिशत र ८४.२७ प्रतिशत रहने देखिएको छ। त्यस्तै, गैर नाफामूलक संस्थाको उपभोगको अंश १.९२ प्रतिशत रहने अनुमान छ।
कुल उपभोगमा सरकारी क्षेत्रको उपभोगको अंश घट्दो प्रवृत्तिमा रहेको छ भने निजी क्षेत्र र गैर नाफामूलक संस्थाको उपभोगको अंश बढ्दो प्रवृत्तिमा छ।
चालु आर्थिक वर्ष सरकारी क्षेत्र, निजी क्षेत्र र गैर नाफामूलक संस्थाको उपभोगको अनुपात क्रमशः ७.७६ प्रतिशत, ९०.१८ प्रतिशत र २.०६ प्रतिशत रहने अनुमान छ।
गत आर्थिक वर्ष यस्तो अनुपात क्रमशः ७.९३ प्रतिशत ९०.०६ प्रतिशत र २.०१ प्रतिशत रहेको थियो।
कुल निजी उपभोगमा खाद्य वस्तु उपभोगको अंश बढी छ। चालु आर्थिक वर्ष कुल उपभोगमा खाद्य वस्तु, गैर खाद्य वस्तु र सेवाको अंश क्रमशः ४९.३० प्रतिशत, १८.१९ प्रतिशत र ३२.५१ प्रतिशत रहने अनुमान छ ।
गत आर्थिक वर्ष यस्तो अंश क्रमशः ४८.५४ प्रतिशत, १८.३७ प्रतिशत र ३३.०९ प्रतिशत थियो।
पछिल्लो दशक कुल निजी उपभोगमा खाद्य, गैर खाद्य वस्तु र सेवाको अंश वार्षिक औसत क्रमशः ४८.९८ प्रतिशत, १८.५८ प्रतिशत र ३२.४४ प्रतिशत रहेको छ।
