चालु आर्थिक वर्षको पहिलो चार महिनामा विदेशसँगको सेवा कारोबारमा ३२ अर्ब ९१ करोड रूपैयाँ बराबरको घाटा देखिएको छ।
राष्ट्र बैंकको मासिक प्रतिवेदन अनुसार अघिल्लो आर्थिक वर्षको सोही चार महिनामा यस्तो घाटा २२ अर्ब ३७ करोड रूपैयाँ रहेको थियो। यस अवधिमा विदेशबाट आउने भ्रमण आम्दानी ०.९ प्रतिशतले बढेर २७ अर्ब १५ करोड रूपैयाँ पुगेको छ। अघिल्लो वर्षको सोही अवधिमा यस्तो आम्दानी २६ अर्ब ९० करोड रूपैयाँ थियो।
तर विदेश भ्रमणका लागि हुने खर्च भने छिटो बढेको देखिएको छ। चार महिनामा विदेश भ्रमण व्यय ११.८ प्रतिशतले बढेर ७५ अर्ब ७४ करोड रूपैयाँ पुगेको छ। अघिल्लो वर्षको सोही अवधिमा यस्तो व्यय ६७ अर्ब ७५ करोड रूपैयाँ रहेको थियो।
भ्रमण व्ययमध्ये पढाइका लागि विदेश पठाइएको रकम ४८ अर्ब २६ करोड रूपैयाँ पुगेको छ। अघिल्लो वर्षको सोही चार महिनामा शिक्षातर्फको खर्च ३७ अर्ब ७७ करोड रूपैयाँ थियो।
राष्ट्र बैंकका अनुसार विदेशबाट आउने सेवा आम्दानीको तुलनामा विदेशमा हुने खर्च बढी हुँदा चालु आर्थिक वर्षको सुरूआती चार महिनामै विदेशी सेवा कारोबार घाटामा गएको हो।
-1746009348.jpg)
