कात्तिक महिनामा बैंक तथा वित्तीय संस्थाहरूबाट निजी क्षेत्रमा जाने कर्जा वार्षिक आधारमा ६.९ प्रतिशतले बढेको छ।
राष्ट्र बैंकको मासिक प्रतिवेदनअनुसार यस अवधिमा निजी क्षेत्रतर्फ प्रवाहित कर्जा ५५ खर्ब ६२ अर्ब ७५ करोड रूपैयाँ पुगेको हो। चालु आर्थिक वर्षको पहिलो चार महिनाको आधारमा हेर्दा भने निजी क्षेत्रमा जाने कर्जा १.२ प्रतिशतले मात्रै बढेको छ। अघिल्लो वर्षको सोही चार महिनामा कर्जा २.५ प्रतिशतले बढेको थियो।
कर्जा प्रवाहको संरचना हेर्दा निजी क्षेत्रमा जाने कर्जामध्ये ६२.६ प्रतिशत गैर-वित्तीय संस्थागत क्षेत्रतर्फ र ३७.४ प्रतिशत व्यक्तिगत तथा घर परिवार क्षेत्रतर्फ पुगेको छ। अघिल्लो वर्षको सोही अवधिमा यी अंश क्रमशः ६४.१ प्रतिशत र ३५.९ प्रतिशत थियो।
बैंक र वित्त कम्पनीहरूले प्रवाहित गर्ने कर्जा १.३ प्रतिशतले बढेको छ भने विकास बैंकको कर्जा प्रवाह ०.१ प्रतिशतले घटेको छ।
धितोको आधारमा हेर्दा बैंक तथा वित्तीय संस्थाहरूको लगानीमा रहेको कर्जा चालु सम्पत्ति, कृषि तथा गैरकृषिजन्य वस्तुको सुरक्षणमा १५.० प्रतिशत रहेको छ भने घरजग्गा धितोमा आधारित कर्जा ६४.४ प्रतिशत रहेको छ। अघिल्लो वर्षको सोही अवधिमा क्रमशः १३.५ र ६६.० प्रतिशत थियो।
क्षेत्रगत रूपमा कर्जा प्रवाहमा निर्माण क्षेत्र ३.२ प्रतिशत, यातायात, सञ्चार तथा सार्वजनिक सेवा क्षेत्र २.९ प्रतिशत, औद्योगिक उत्पादन क्षेत्र १.९ प्रतिशत, उपभोग्य क्षेत्र १.७ प्रतिशत, थोक तथा खुद्रा व्यापार ०.४ प्रतिशत र सेवा उद्योग क्षेत्र ०.१ प्रतिशतले बढेको छ।
यसै अवधिमा कृषि क्षेत्रको कर्जा २.६ प्रतिशत र वित्त, बीमा तथा अचल सम्पत्ति क्षेत्रको कर्जा २.५ प्रतिशतले घटेको छ।
कर्जाको प्रकृति अनुसार मार्जिन प्रकृतिको कर्जा ३.९ प्रतिशत, रियल स्टेट कर्जा ३.४ प्रतिशत, क्यास क्रेडिट कर्जा १.८ प्रतिशत, हायर पर्चेज कर्जा १.३ प्रतिशत, माग तथा अन्य चालु पुँजी कर्जा १.१ प्रतिशत र आवधिक कर्जा ०.९ प्रतिशतले बढेको छ।
यस अवधिमा अधिविकर्ष कर्जा ४.९ प्रतिशत र ट्रष्ट रिसिट, आयात कर्जा २.१ प्रतिशतले घटेको छ।
-1746009348.jpg)
