भारतीय विद्युत र आवास तथा सहरी मामिला मन्त्री मनोहरलाल खट्टर नेपाल आउने भएका छन्।
मन्त्री खट्टर अरूण–३ जलविद्युत आयोजनाको अवलोकनको लागि मंगलबार (वैशाख ९ गते) नेपाल आउन लागेका हुन्।
भारतीय कम्पनी सतलज जलविद्युत निगम (एसजेविएन)को स्वामित्वमा रहेको एसजेविएन अरूण–३ पावर डेभलपमेन्ट कम्पनी (एसएपिडिसी)ले निर्माण गरिरहेको उक्त आयोजनाको निरीक्षणको लागि मन्त्री खट्टर आउन लागेको उल्लेख गरिएको छ।
आयोजनाको अवलोकन गरी खट्टर बुधबार भारत फर्कने छन्। साथै, ऊर्जा, जलस्रोत तथा सिँचाइमन्त्री दीपक खड्का पनि अरूण–३ को अवलोकन गर्न पुग्ने मन्त्रालयले जनाएको छ।
उक्त कार्यक्रममा एसजेविएनका अध्यक्ष राज कुमार चौधरी तथा प्रमुख प्रशासकीय अधिकृत (सिइओ) प्रशान्त शर्माको पनि सहभागिता हुने आयोजनाले जनाएको छ।
खट्टरले समकक्षी खड्कासँग अन्य जलविद्युत आयोजनामा भारतीय लगानी साथै नयाँ आयोजनाका विषयमा छलफल गर्ने कार्य तालिका रहेको मन्त्रालयले जनाएको छ।
उनले ९ गते नै अरूण–३ जलविद्युत आयोजनाको बाँध तथा पावर हाउस क्षेत्रको निरीक्षण गर्नेछन्।
सोही दिन ऊर्जामन्त्री खड्कासँगै भारतका विद्युत मन्त्री खट्टरले विभिन्न ठाउँका सवस्टेसन संयुक्त रूपमा उद्घाटन गर्ने छन्।
यसैगरी दुई देशले संयुक्त लगानीमा निर्माण गर्न लागेको प्रसारण लाइनको सम्झौतापत्रमा हस्ताक्षर गरेर निर्माणको प्रक्रिया अगाडि बढाइने मन्त्रालयको भनाइ छ।
वैशाख १० गते मन्त्री खट्टरले मुस्ताङको मुक्तिनाथको दर्शन गरी नेपाली मन्त्री तथा प्रधानमन्त्रीलाई भेटेर भारत फर्किने एसजेविएनले जानकारी दिएको छ।
