नेपाल चेम्बर अफ कमर्सले आगामी बजेट वितरणमुखी नभई उत्पादनमुखी बनाउन अर्थमन्त्री डा. प्रकाशशरण महतसमक्ष आग्रह गरेको छ।
आगामी बजेटमा सुझाव दिने क्रममा चेम्बरले बजेट यथार्थपरक र कार्यान्वयन योग्य तथा चुस्त दुरुस्त हुनु पर्नेमा जोड दिएको हो।
अर्थतन्त्रलाई चलायमान बनाउन एवम् वर्तमान शिथिल अर्थतन्त्रलाई उकास्नका लागि बजेट उत्पादनमुखी हुनुपर्ने चेम्बरको माग छ।
अर्थमन्त्री डा. महतलाई चेम्बरले दिएको सुझावमा भनिएको छ, 'गम्भिर आर्थिक शिथिलताले धराशायी हुने संघारमा पुगेका उद्यमी व्यवसायीहरूलाई आवश्यक नीतिगत संरक्षण एवं सहुलियत प्रदान गर्नेगरी बजेट तर्जुमा गरिनु पर्दछ।'
अर्थमन्त्री डा. महतसमक्ष चेम्बरका अध्यक्ष राजेन्द्र मल्लले विनियोजित विकास बजेटलाई समयवद्ध तालिका अनुसार कार्ययोजना बनाएर खर्च गर्न माग गरे।
उनले भने 'विद्यमान अर्थ व्यवस्थामा संकुचित मौद्रिक नीतिले व्यापारको असहजिकरण र नियन्त्रणमुखी आर्थिक नीतिहरूको नकारात्मक प्रभावले गम्भिर आर्थिक शिथिलता उत्पन्न गरेको छ। अबको बजेट उत्पादनमा केन्द्रीत गर्न आवश्यक छ।'
चेम्बरले करको दायरा बढाउन समेत अर्थमन्त्री डा. महतलाई सुझाव दिएको छ।
लक्ष्य अनुसारको राजस्व संकलन हुन नसकेको भन्दै अध्यक्ष मल्लले करको दायरा वृद्धि गर्नु पर्नेमा जोड दिएका हुन्।
नागरिकता वितरण गर्दा सँगै प्यानकार्ड पनि दिने व्यवस्था गर्नुपर्ने अध्यक्ष मल्लले बताए।
भन्सार प्रशासनलाई चुस्त बनाउनु पर्ने भन्दै चेम्बरले भन्सार प्रयोजनका लागि सन्र्दभ मूल्यलाई खारेज गरी कारोबार मूल्यलाई मान्यता दिन समेत आग्रह गरेको छ।
यस्तै, भन्सार नाकाहरूमा अन्तर्राष्ट्रिय स्तरको क्वारेन्टाइन ल्याव राख्न समेत चेम्बरको सुझाव छ।
यस्तै, मूल्य अभिवृद्धि करमा बहुदर प्रणाली लागू हुनुपर्ने र आम उपभोग्य वस्तु र विलासिताका वस्तुहरूमा फरक दर कायम हुनुपर्नेमा पनि चेम्बरले सुझाव दिएको छ।
चेम्बरले व्यक्तिको सम्बन्धमा ८ लाख रुपैयाँ र दम्पत्तिको सम्बन्धमा १२ लाख रुपैयाँसम्मको आम्दानीमा कर छुट दिन समेत अर्थमन्त्रीसमक्ष माग गरेको छ।
नकारात्मक सूचीमा रहेका रक्सी, वियर एवम् सुर्तीजन्य पदार्थ आदिको उत्पादन बाहेक सबै प्रकारका उत्पादनहरूमा अन्तःशुल्क हटाउन समेत चेम्बरले माग गरेको छ।
मुलुकमा रहेका प्राकृतिक स्रोत साधन र जडीबुटीजन्य वस्तुहरूको समुचित प्रवर्द्धन गर्न कानुन बनाई अन्तर्राष्ट्रिय बजारमा निर्यात गर्ने व्यवस्था गर्न पनि चेम्बरले सरकारको ध्यानाकर्षण गराएको छ।
चेम्बरले बाँझो जमिन सदुपयोग नीति बनाएर बजेटमा विशेष व्यवस्था गर्न आग्रह गरेको छ। चेम्बरले दिएको सुझावमा भनिएको छ, 'बाँझो जमिन सदुपयोग गरी कृषि उत्पादनमा आधुनिकीकरण, यान्त्रीकरण एवम् वैज्ञानिकीकरण गरी मुलुकलाई आत्मनिर्भर बनाइनु पर्दछ।'
चेम्बरले घरजग्गा कारोबारलाई व्यवस्थित बनाउन ब्रोकर लाइसेन्स बिना घरजग्गा कारोबार गर्न नपाउने व्यवस्था गर्न समेत अर्थमन्त्री डा. महतको ध्यानाकर्षण गराएको छ।
