उद्योग विभागले ट्रेडमार्क दर्ताका लागि आवेदन दिएर पनि प्रक्रिया पूरा नगरेका व्यक्ति तथा संस्थाहरूलाई ९० दिनभित्र सम्पूर्ण कागजात र शुल्क बुझाउन आग्रह गरेको छ।
तोकिएको समयभित्र प्रक्रिया पूरा नगरे दर्ता आवेदन स्वतः खारेज हुने विभागले जनाएको छ।
विभागले सार्वजनिक गरेको सूचना अनुसार, ट्रेडमार्क दर्ताका लागि आवश्यक कागजातहरू नपुर्याएका आवेदनहरूले ९० दिनभित्र सबै कागजात पेस गर्नुपर्नेछ। त्यसैगरी, औद्योगिक सम्पत्ति बुलेटिनमा सूचना प्रकाशित भएर पनि प्रमाणपत्र लिन नआएका आवेदकहरूले पनि यही अवधिभित्र तोकिएको दस्तुर तिरेर प्रमाणपत्र लिन सक्नेछन्।
'...यो सूचना प्रकाशन भएको ९१ (एकानब्बे) औं दिनमा दरखास्त खारेज भइजाने बेहोरा सम्बन्धित दरखास्तवालाहरूलाई जानकारी गराइन्छ,' विभागले निकालेको सूचनामा भनिएको छ।
यसका साथै, विभागले दर्ता भइसकेका ट्रेडमार्कहरूका सम्बन्धमा पनि अर्को महत्त्वपूर्ण जानकारी दिएको छ।
पेटेन्ट, डिजाइन तथा ट्रेडमार्क ऐन, २०२२ अनुसार, ट्रेडमार्क दर्ता भएको एक वर्षभित्र त्यसलाई प्रयोगमा ल्याउनुपर्ने व्यवस्था छ।
विभागले दर्ता भएका ट्रेडमार्कका धनीहरूलाई ६० दिनभित्र आफ्नो ट्रेडमार्क प्रयोगमा ल्याएको प्रमाण वा उत्पादनको नमूनासहित विभागमा जानकारी गराउन सूचित गरेको छ।
-1742801159.jpg)
-1746009348.jpg)
